Gengið umhverfis Hvalfell

Á föstudaginn síðasta að vinnudegi loknum lögðum við land undir fót með Guðna og Gauta. Við gengum hringinn í kring um Hvalfell í Hvalfirði. Við tjölduðum "fyrir aftan" fjallið við Hvalvatnið og kláruðum hringin morguninn eftir. Þetta er ofsalega falleg leið og hvorki löng eða erfið.
Um nóttina fór hitastigið niður í frostmark og það er náttúrulega magnað þann 20. júní

Næstu tvær helgar verður svo lítið gengið. Nú eru brúðkaup og ættarmót framundan.

Við Glym

Guðni í Botnsá við Breiðafoss

Botnsdalur

Hvítasunnan 2009

Við brugðum undir okkur betri fætnum og stóru dekkjunum um hvítasunnuna og gerðum víðreist. Það var alveg svakalega gaman hjá okkur. Það byrjaði með sumarbústaðarferð með Jóni og Guðrúnu. Það klikkar ekki að koma að Hlíðarenda og maður skilur hversvegna fyrri ábúendur vildu ekki fara rassgat. Eftir góða stund í bústaðnum og smá flandur um suðurlandið skildu svo leiðir og við héldum áfram til suðurs.

Þakgil var skoðað en svo fórum við torleiða um Svínatungur að Heiðarvatni. Þarna við Kötlurætur er gífurleg fegurð og landslag hrikalegt. Þarna gistum við eina nótt. Daginn eftir dóluðum við okkur í átt að Geysi þar sem nýútskrifaður leiðsögumaður tók á móti okkur og sýndi snilli sína í leiðsögn um svæðið. Jón Örvar sýndi okkur markverðustu staði svæðisins, hótelið, Haukadalsskóg og skemmtilega leynistaði hér og þar. Seint um kvöld keyrðum við í átt að Brúarárskörðum og grilluðum okkur miðnætursnarl, skriðum í tjald, lásum bændablaðið og fórum að sofa.

Mánudagurinn fór svo í gönguferð um Brúarárskörð en þar er mjög gaman að koma. Svipmyndir helgarinnar eru hér meðfylgjandi.

Frábært!!

Augnabliki áður en ég varð rennandi...

Á rölti um Brúarárskörð

Í Svínatungum sunnan Kötlujökuls

Við Faxa