Lífið eftir kosningar

Já það er spurning hvort það verði einhver breyting á Alþingi, þetta fór nú ekki alveg eins og ég var að vona þótt þetta hafi kannski verið pínu í áttina, en það var ekki nóg. En ég nenni ekki að vera með einhvern langan pistil um kosningarnar, þetta er búið og lífið heldur áfram.

Á laugardaginn fór ég í frábæra göngu upp á Heklu og renndi mér svo niður á þoturassi. Sumir voru enn metnaðarfyllri en ég og örkuðu upp með skíði og skíðaskó eða bretti og brettaskó. Hér eru myndir

Þegar heim var komið úr Hekluferðinni beið mín dýrindismáltíð à la Mundi og Guðni og eftir matinn var haldið í útskriftar/júróvisjón/kosnigapartý hjá Fanneyju. Það var æðislega gaman og lauk kvöldinu á kosningavöku VG á Sögu. Það er orðið ansi langt síðan ég fór síðast á djammið og ég mundi af hverju þegar ég vaknaði þunn á sunnudaginn. Mikið er nú ömurlegt að vera þunnur og þótt það sé alveg gaman að djamma þá tek ég ferð upp á hálendið alltaf fram yfir djamm í bænum. Og nú með hækkandi sól er markmiðið bara að fara helst út úr bænum allar helgar!