Í nágrenni Sandgerðis í dag

Það er allt á suðupunkti í vinnunni enda opnun hátíðarinnar á morgun. Þótt ég hafi í rauninni ekki tíma til þess þá langaði mig til að henda hér inn nokkrum línum til að segja ykkur hversu gaman það er að fá að taka þátt í að skipuleggja þessa miklu hátíð, jafnvel þótt ég sé stundum alveg komin með nóg og langi bara heim í sófa og sofna út frá imbanum. Mig langaði líka að segja ykkur hvað mér finnst frábært hvað daginn er farið að lengja mikið, nóg hjólar maður bara í og úr vinnunni í björtu og ég er ekki frá því að þessi kærkomna birta lífgi upp á sálartetrið.

En ég hef ekki tíma til að skrifa meira, verð að fara að gera eitthvað að viti hérna í vinnunni, það bíða mín trilljón verkefni. Vonast til að sjá ykkur öll á Austurvelli annað kvöld kl. 20 og í Hafnarhúsinu á laugardagskvöldið kl. 22 á ókeypis tónleikum Dionysos.

Reykjanes

í dag var farið í jeppaferð um Reykjanes. Þrjár svipmyndir frá deginum fylgja. :)

Á Eyrarfjalli sunnudaginn var

Útilegulíf

Ferðin til Ísafjarðar síðustu helgi var alveg frábær og vel heppnuð. Náðum að skíða alla dagana; gönguskíði á föstudeginum og svigskíði hina tvo dagana. Svo var ekki síður mikilvægt að skemmta sér í góðra vina hópi, borða góðan mat, drekka smá vín og spila Trivial. Þetta var sem sagt ein af þessum fullkomnu helgum og ég gerði mér grein fyrir því að maður gerir allt of lítið af því að skreppa á Vestfirðina, OK maður getur kannski varla talað um að "skreppa" í þessu sambandi, vorum 7,5 tíma hvora leið, en mikið er nú fallegt þarna og landslagið mikilfenglegt.

Næstu helgi er svo Flubbaferð hjá mér og er það fjórða helgin í röð sem ég fer út úr bænum. Alltaf nóg um að vera enda er lífið skemmtilegast þannig. Mundi verður í bænum að mála og sjá um Moggaútburð fyrir mig. Það er nú ekki alveg það skemmtilegasta sem hann veit en eftir þessa helgi fer nú að draga aðeins úr þessum útilegum mínum og ég get farið að vera duglegri í laugardagsútburðinum.

Annars er líka brjálað að gera í vinnunni að undirbúa frönsku hátíðina sem hefst 22. febrúar. Vil benda ykkur á spennandi tónleika laugardaginn 24. febrúar í Hafnarhúsinu (frítt inn) með franskri grúppu sem kallar sig Dionysos. Svo er heimasíðan líka alveg að verða tilbúin en það mun bætast fullt af efni inn á hana á næstu dögum: www.pourquoipas.is

Plönin um að komast í betra form ganga ágætlega. Er dugleg að hreyfa mig og er farin að borða aðeins hollari mat án þess að fara út í einhverjar öfgar. Er aðeins farin að finna fyrir meiri orku og buxnastrengurinn herðir ekki alveg eins mikið að og hann gerði. Þetta er því allt á réttri leið...