Gleðilegt ár

Hjá okkur verður líklega ekki mikið af flugeldum þetta árið. Því látum við okkur þessa mynd af netinu nægja þetta skiptið.

En við viljum þakka ykkur fyrir samverustundirnar á árinu 2005 og hlökkum til að sjá ykkur sem flest á nýju ári 2006.

keðjur

já þessi góða skíðaferð varð bara að hálfgerðri svaðilför. fram að hádegi var svona líka bongóblíða en þá snarþykknaði upp og fór að snjóa. við héldum ótrauð áfram skíðaiðkun fram eftir degi samt sem áður. þetta er alveg frábært skíðasvæði. ég náði því að detta á ofsahraða í dag og mátti litlu muna að ég tæki niður einn franskan brettamann, en hann lifir og ég líka. en hjálmurinn nýji sannaði gildi sitt.

þegar við svo ætluðum að fara heim var allt komið á kaf í snjó og fjallvegirnir að verða vafasamir fyrir litla fólksbíla á sumardekkjum!! já - þau voru hreint ekki að gera marga góða hluti sumardekkin, en við brugðumst snarlega við, stoppuðum í fjalla-kaupfélaginu og versluðum keðjur. á keðjunum var svo ekið heim. nú er sænska freðmýrastálið því hlekkjum vafið og óstöðvandi með öllu í verstu vetrarhörkum. ég stefni að því að bæta tíma smurkoppanna sem sigruðu suðurpólinn á einhverjum fordbúðing eins fljótt og auðið verður. :-)

leiðin heim sóttist hægt vegna umferðar og það er búið að taka okkur rúma 3 tíma að komast hingað heim, eitthvað sem tekur vanalega svona 40 mínútur. en hér erum við!

jæja nú verður látið reyna á...

...útivistarfatnaðinn. já það er víst til lítils að eiga hann bara en nota ekki. hér er nefnilega alveg svakakuldi, og á enn að kólna. skilst að það eigi að ná -19 stigum í kvöld og nótt. það er ekki vanalegt hér á láglendinu.

en við ætlum á skíði í dag. erum bara að fá okkur morgunkaffið. þetta skiptið á að kanna nýjar lendur og fara upp í vercors, og skíða í villard de lans. þar munum við fyrir finna helgu og eirík ásamt 2 öðrum íslendingum með þeim og rúsínan í pulsuendanum er svo sú að innan nokkurra mínútna ætlar okkar ágæti vinur Georges að koma hingað og fylga okkur á fjöll, en hann eyðir jólunum hér á heimaslóðum.

þá er það bara að bresta á - best að bæta við eins og einni peysu!!! :)

milli jóla og nýárs

hérna hjá okkur hafa jólin verið róleg og góð. jóladag og annan var púls vart mælanlegur, þriðja dag jóla fór hann að finnast aftur. en alveg eins og við hefðum haldið jólin heima þá hefur ekki verið skortur á einhverju að bíta og brenna. það er margt sem búið er að framreiða hérna undanfarna daga, þar á meðal hörpuskel, andakjöt og lifrar, kornhænur, hráskinku og melónur og svo videre. millitíminn á konfektkassanum var einnig með besta móti þetta árið.

hér snjóar í dag, - ekki er það nú mikið, en allur snjór er vel þeginn. bíðum bara eftir uppstyttu.

GLEÐILEG JÓL

Við óskum ykkur gleðilegra jóla.

þorláksmessa

svona lítur torg Victors Húgó út þessa dagana. þar er jólamarkaður sem ég fór og myndaði rétt eftir ljósaskiptin í gær. dagurinn í dag verður annars tekinn rólega fram að kveldmat en þá erum við boðin til Helgu og Eiríks og hinna ísfirðinganna í saltfisk og grín.

og svo á hún mamma mín afmæli í dag. sendum henni okkar innilegustu hamingjuóskir.

skýjum ofar

mig langar nú að byrja á því að þakka fyrir allar afmæliskveðjurnar sem mér bárust í fyrradag. takk.

í gær skelltum við okkur svo á skíði í les7laux. fengum skíðadag eins og þeir gerast bestir, en það vantar þó enn smá snjó. hér í grenoble var skýjað, en skýjum ofar var þessi líka bongó blíða. hann eiríkur tók af okkur þessa mynd og sendi.

við ætlum svo að gera jólainnkaupin núna, kaupa hátíðafæðið. önd verður það þetta árið.

....

ég held að ég verði að fara að ná í skíðin mín. þau enduðu nefnilega á verkstæði eftir síðustu skíðaferð, fengu slatta af rispum. maður á víst ekki að skíða í grjóti. ætli ég geri það ekki að verkefni dagsins. það er nefnilega að koma skíðahugur í mig aftur. svo þyrfti ég að kíkja í bæinn líka. hér mega jólin nefnilega bara alveg fara að koma, það er næstumþví allt klárt!

í kvöld ætlum við svo að fara út að borða á uppáhaldsveitingastaðinn okkar hérna "la panse" sem þýðir hvorki meira né minna en "vömbin" á hinu ástkæra ylhýra. já sú verður kýld.

grenoble over

Laufabrauð.

var verkefni laugardagsins. fyrir þónokkru síðan ákváðum við að steikja laufabrauð fyrir jólin. en þannig er nú mál með vexti að ýmislegt sem þarf til þeirrar gerðar er vandfundið hér í frans. við töluðum því við billundhjónin og fengum sent frá þeim uppskrift og allt sem þurfti ásamt járni til útskurðar. Snæbjörn gaf okkur svo uppskrift af rúgmjölskökum.

svo boðuðum við íslendingana á svæðið og á laugardaginn komu þeir hingað með mótpörtum og við gerðum einar 4 tegundir af laufabrauði, að ég held um 50 kökur. þetta var alveg ofsalega gaman, og við tókum nett tjútt með söng og tilheyrandi áður en allt var afstaðið.

...og úr varð bara hið besta laufabrauð.

í kvöld...

...verða eldaðar og étnar froskalappir...

... .. ..... ... . ....Ribbid.... ... ... .. . . .

reyna bara að falla í hópinn.....

ég rakst á þessa skemmtilegu mynd á netinu í dag.

...annars allt með kyrrum kjörum á suðausturvígstöðvunum.

hann pabbi minn er afmælisbarn dagsins - til hamingju með daginn.

bæjarrölt og parkeringar

í dag lagði ég bílnum mínum í fyrsta skipti á algerlega franskan máta - ég hreinlega ruddi bílnum fyrir aftan nokkra metra þangað til það var komið stæði fyrir volfgang. hananú!!! setti svo í frígír og lét mig hverfa. annars fór ég og skoðaði miðbæinn, þar eru nú huggulegir jólamarkaðir í litlum bjálkahúsum á öllum torgum. stemming að rölta þar um, verslaði nú ekki neitt en sá, eins og vanalega, þegar ég ætla að finna eitthvað handa öðrum, - eitthvað handa mér... ;)

afmælismánuðurinn desember er byrjaður og hann snæbjörn er afmælisbarn dagsins - til lukku.

22 lönd, 9 % af heiminum

Sem sagt nóg eftir!!

create your own visited country map
or check our Venice travel guide

hvílíkur dagur

Skíði

eftir 9 daga þoku og regn kom tíundi dagurinn og þrátt fyrir að nú sé enn myrkur má greina að skýin eru farin annað. þá er um að gera að drífa sig bara upp í les2alpes - 3600 metrar og ekkert minna.

njótið dagsins, það ætlum við að gera.

Það er að koma helgi

Ég var að koma heim frá því að binda saman 30 bls. verkefni sem ég þarf að skila á mánudaginn. Gott að vera búin með það en enn er nóg eftir: 5 verkefni og eitt próf. Öll þessi verkefni eiga að vera á bilinu 10-40 bls. svo það er nóg að gera. Ekki má svo gleyma því að ég verð að vera búin að undirbúa fullt af kennsluefni fyrir verknámið mitt áður en ég legg í'ann heim. Ég átti fund með leiðbeinandanum mínum í morgun þar sem við sendum frönskukennaranum sem mun hafa umsjón með mér í MR bréf þar sem við báðum hana (og hinn frönskukennarann) um að prufa kennsluefnið mitt líka svo að niðurstöðurnar yrðu marktækari. Vonandi taka þær vel í það en það er þó alls ekki öruggt þar sem þeim finnst kannski að þá sé verið að leggja of mikla áherslu á "munnlega" frönsku, veit ekki hvernig þetta fer, kemur bara í ljós. Kannskui hafa þær engan áhuga á að taka leiðsögn frá.

En ég ætla að taka mér frí frá þessu öllu saman á morgun og fara á skíði með Munda, Eiríki og Helgu og hver veit nema Guðni skelli sér líka með. Það er búið að snjóa alveg helling undanfarna daga og spáð glampandi sól á morgun. Eftir skíðin er stefnan svo tekin á afmæli hjá Ásdísi. Stefnir því allt í frábæran dag á morgun!

Góða helgi!

þetta helst

það er bara ekkert lát á rigningu og þoku hér. hér er nú búið að vera þannig veður síðan ég fór á skíði síðast, og nú er slydda fyrir utan gluggann minn. sannkallað reykjavíkurveður, en hins vegar er spáin eins og fyrir norðan ! :-)

verkefni dagsins datt inn á borðið til mín í gær. Frú Rósdal (Madame Rosanvallon) sú sem býr hérna á efri hæðinni kom til mín í gær. heima hjá henni er ýmislegt úr lagi gengið og bað hún mig að koma til þess að reyna að laga fyrir sig sitt lítið af hverju. Þar er hurð að detta af lömum, vantar gerekti á aðra, lýsing í ólagi, lampi sem þarf að lóða saman og ég veit ekki hvað og hvað. ég ætla því að reyna að kippa því sem ég get í liðinn á þeim bæ.

já húsvörðurinn færir út kvíarnar....

pass

hér er status quo. full rólegt hjá mér en full mikið að gera hjá Svanhildi. það hefur ekki viðrað á skíðin undanfarna daga, en síðan ég fór síðast hefur snjóað í fjöllin á hverjum degi held ég bara. þegar rofar til í þokunni þá er ég stokkinn af stað.

svo rakst ég á þetta bráðskemmtilega myndband frá akureyri á netinu í dag - endilega lítið á -smella hér-

Heaven and hell

mér finnst þetta alltaf jafn sniðugt :) njótið dagsins

allt brjálað ......

...og það er bara í góðu lagi - gleðilegan fullveldisdag...