Mynd dagsins

...er asnalegri en sú í gær...

Mynd dagsins

er frá Annecy í þetta skiptið.

Steinhissa

það er ósköp venjulegur dagur og maður röltir á kaffihúsið hérna úti á horninu til að fá sér einn bolla. með honum fær maður þá sykurbréf með mynd af kirkjunni hans Hallgríms. ég er svo rasandi rasandi !!!!! :)

Dagurinn og vegurinn

það hefur farist fyrir undanfarið að setja færslur hérna inn - þær koma í það minnsta ekki eins reglulega núna og oft áður.

hverju er um að kenna, leti, hugmyndaleysi eða bara tíðindaleysi það er ekki gott að segja, en einhverskonar sambland af þessu öllu er kannski ekki svo slæm skýring. það er kannski árstíminn, mér sýnist allavega að sambærilegar síður sem ég heimsæki reglulega eigi við sama vanda að stríða, sumar hverjar í það minnsta.

þessi helgi leið tíðindalítið. hér var rigning og súld hangandi yfir og nenna almennt lítil. föstudagurinn var hins vegar fullbókaður. hann Jón paríslenski kom nefnilega í fylgd foreldra sinna þeirra Sigurvins og Svanhildar. þar með var hæsta hlutfalli Svanhilda náð í grenoble síðan mælingar hófust. þau borðuðu með okkur hádegismat hérna heimvið og síðan fylktum við liði með Jón í broddi fylkingar inn í bæ og alla leið á kjarnorkustofnunina þar sem hann varði mastersverkefni sitt á glæsilegan hátt og getur nú kallað sig verkfræðing. hann var ekki öfundsverður þar sem hann stóð fyrir framan 6 stykki atómhausa og svaraði spuringum um framleiðslu vetnis. en gerði það vel. okkar innilegustu hamingjuóskir Jón.

að því loknu fórum við síðan öll í miðbæinn en þar voru dagar víns og tónlistar frá fimmtudegi og fram á sunnudag. gegn vægu gjaldi var hægt að fá að smakka allt það besta frá fjöldamörgum vínbændum, sem flestir komu frá Bordeaux eða Bourgogne. Einhverjir voru þarna frá Alsace með hvítvínin sín. ég var pínu spældur að Rónarbændur héldu sig heima, þeim hefur kannski ekki þótt nauðsynlegt að kynna sínar afurðir hérna í þessum nærliggjandi hreppi. Þarna á torginu bættust síðan Eiríkur og Helga í hópinn. Kvöldinu eyddum við síðan við pízzuát með þeim en Jón og meðreiðarsveinar og meyjar héldu til baka til parísar um kvöldmatarleitið.

í þessari viku fáum við svo gesti. Snæbjörn er í sinni árvissu ferð í flugherminn í parís og tók frú og son með og þau ætla að koma hingað að tölvuleik loknum á fimmtudag og vera hérna með okkur fram yfir helgi. einhverju sniðugu verður því fundið upp á í vikulokin.

Skólaskemmtun

í gærkvöldi fórum við Mundi á skólaskemmtun fyrir nemendur í minni deild sem og nema við útlendingadeildina. Svona skemmtun var líka haldin í fyrra og tókst svo vel að það var ákveðið að endurtaka leikinn. Aðgangseyrir á skemmtunina er matur eða drykkur frá heimalandinu eða heimasýslunni (fyrir Frakkana). Í fyrra mættum við Mundi á svæðið með hákarl og brennivín og vakti þetta þvílíka lukku. Það voru nú ekki allir mjög hrifnir af hákarlinum (meira kannski bara tveir með Munda) en allir voru þvílíkt stoltir af að hafa prufað og líterinn af brennivíninu var ekki lengi að klárast.

Í gærkvöldi mættum við svo með Viking bjór á svæðið. Fólk varð fyrir þvílíkum vonbrigðum, búið að hlakka til að fá aftur hákarl. Svo við Mundi þurftum að útskýra fyrir fólkinu að því miður hefðum við bara ekki átt neinn hákarl og það væri hægara segt en gert að ætla að redda sér honum í Frakklandi. En þegar þau komust svo að því að við ættum von á heimsókn frá Íslandi þá var strax ákveðið að við myndum láta færa okkur eina krukku af hákarli og það yrði haldin önnur svona skemmtun fyrir jólafrí. Við erum sem sagt búin að gera Frakka alveg húkkt á hákarli og búin að lofa þeim smakki fyrir jól!

Annars var þetta bara hin fínasta skemmtun og mér til mikillar gleði var haldin limbókeppni sem ég rúllaði að sjálfsögðu upp!

Mynd dagsins

Er af Mont Blanc

Bongó

Bráðum kemur ekki betri tíð,
því betri gæti tíðin, því betri gæti tíðin, ekki orðið.

á ekki að vera haust ????

Svartur á leik

ég var að lesa það að þessi bók, svartur á leik yrði fulltrúi íslenskra sakamálasagna í keppninni um glerlykilinn, bestu norrænu sakamálasöguna.

ég var einmitt að klára þessa bók í fyrradag. hún er alveg mögnuð, stórskemmtileg og á köflum ógeðfelld íslensk undirheimalesning. greinilegt að höfundurinn hefur unnið mikla heimavinnu áður en hann kom þessu á blað.

segjum þetta gott úr bókmenntahorninu að sinni ;-)

Sitt lítið af litlu um lítið

Hér í Grenoble gengur lífið vanaganginn. við erum farin að fá símhringingar og spurningar um hvort að eigi nú ekki að fara að blogga!! héðan er bara allt þokkalegt að frétta, helst verst að Svanhildur náði sér í lókalkvefið og liggur með tærnar upp í loft með bók í annarri og snýtubréf í hinni.

ég fór upp í bastillu í gærmorgun í blíðviðri og naut útiveru og útsýnis sem hefði reyndar getað verið betra vegna misturs. í gær og í morgun var ég svo að brasast í því að strauja tölvuna, ég formattaði hana og setti upp alveg upp á nýtt. nú er hún semsagt farin að virka aftur.

andleysið algjört. meira seinna

Grenoble over and out

Paparazzi

í dag varð ég vitni að hasar út um gluggann minn. í húsi hérna gegnt okkar var ölvaður og örvinglaður maður sem snappaði. hann stóð úti á svölum, upp á handriðinu á 4. hæð og gargaði og gólaði öll ljótu orðin sem hann kunni og hótaði því að henda sér fram af.

ekki leið á löngu þar til lögregla og slökkvulið mættu á staðinn með körfubíla og alle græ til að reyna að róa manninn og ná honum heilum niður. stóð það yfir í dágóða stund - eða um hálftíma gæti ég trúað. að lokum hefur þeim tekist að dýrka upp hurðina á íbúðinni og læðast inn. og á meðan slökkvuliðsmenn í körfunni beindu athyglin mannsins í aðra átt þá komu þeir aftan að honum og tókst að rífa hann ofan af handriðinu og niður á svalirnar. meira veit ég svosem ekki, en þetta var í senn æsispennandi og óhugnalegt á að horfa.

með nýja dótið að vopni tók ég því mína fyrstu fréttaljósmynd, hún er nú svosem ekki sú besta, en þar má greina slökkvuliðsmenn í körfu og svo manninn sem átti ekki góðan dag. ég náði henni nokkrum sekúndum áður en þeir gallaklæddu réðust til eldsnöggrar atlögu.

- ég finn fyrir vissum paparazzifíling !!! :)

Skype

haustið er farið að sýna sig í grenoblehreppi. hér hefur snarkólnað og er búið að ganga á með rigningu síðan í gær. brrr...

en áðan var ég að tengja skype-síma við tölvuna okkar. ég held að hann sé bara farinn að virka eðlilega eftir smávægileg byrjunarvandamál. úr honum get ég hringt í aðra skypenotendur svo og í heimasíma, þá vel ég hvort ég nota netið til að hringja í gegn um eða fastlínu.

sjá skype.com og dualphone.net

sniðugt apparat

skypekennið okkar er: mundi74@skype.com