fréttaskeyti

allt í gúddí. stopp. 28 gráður og næs. stopp. gestir í lest og allt klárt. stopp. áhugasamir um tónlist ættu að kíkja á tónlist.is, þeir eru að gefa tónlist núna í 3 daga. stopp. hér eru semsagt allir þræðir rauðir. stopp.

góða helgi. stopp.

Roger over and out

Meindýr

Ég er búin að vera dugleg við það undafarna tvo mánuði að skella mér út að skokka á morgnanna, alveg frábært um leið og maður er búinn að drífa sig af stað og þó að fitunni líði nú enn aðeins of vel á líkamanum mínum þá finn ég hvað þolið hefur aukist og ég er ekki frá því að ég hafi líka meiri orku á daginn en áður. En ég ætlaði nú ekki að tala um þetta heldur ætlaði ég að segja ykkur frá skokkferð minni í morgun. Ég hleyp alltaf smá hring hérna meðfram ánni og á einum stað er brú yfir ánna og göngustígurinn liggur undir brúnna meðfram ánni. Haldið ekki að þar sem ég er að hlaupa undir brúnna verði á vegi mínum risastór og loðin dauð rotta. Frekar ógeðslegt og ég tók stóran sveig til að koma ekki nálægt henni og spretti aðeins úr spori.

Þegar heim var komið var sest við tölvuna, eftir sturtu og morgunmat, og byrjað að læra. Veðrið er frábært svo ég er búin að vera með opna glugga. Haldiði ekki að ég heyri svo frekar ógnvænlegt suð í kringum mig, lít upp og kominn risa geitungur í heimsókn. Ég hljóp í dyragættina, horfði skelfingu lostin á fluguna og beið eftir að hún drullaði sér út aftur. Þorði alls ekki að ná í skordýraeitrið og spreyja á hana því ég var þess fullviss að þá mundi hún brjálast og ráðast á mig og gera það að sínu síðasta verki fyrir dauðann að stinga mig. Held ég hafi verið búin að standa í dyragættinni, tilbúin að loka hurðinni og hlaupa fram á gang, í 20 mínútur þegar blessuð flugan fattaði loksins hvernig hún kæmist aftur út og ég hljóp til og lokaði gluggunum.

Já ég er aldeilis búin að lenda í ævintýrum í dag, það er nú ekki á hvejum degi sem maður rekst á rottur og skelfur af hræðslu yfir heimsókn lítillar flugu. Verð að viðurkenna að þetta er búið að taka á og vonast ég því eftir að eiga rólegan eftirmiðdag, í næði frá meindýrunum.

AAAAAAAAAARRRRRRRRRRRRRRRRRGGG

Haldiði að blessuð tölvan hafi ekki tekið upp á því að vera með einhver leiðindi og ákveðið að frjósa. Þar með hvarf hálf blaðsíða. ÓÞOLANDI!

Læri læri tækifæri

Ég er búin að sitja sveitt við tölvuna frá því við komum heim frá Genf og er bara búin að vera ansi dugleg. Í gærmorgun var eitt skilaverkefni klárað og það bættust svo tvær blaðsíður við lokaritgerðina mína. Svo var ég að lesa yfir ritgerð fyrir mömmu eins og ég geri öðru hvoru þegar hún er að skila einhverjum stórum verkefnum og hef alltaf gaman að. Finnst bara verst að geta ekki sent henni verkefnin mín til yfirferðar áður en ég skila þeim. Það er svo gott að fá smá álit og leiðréttingar frá einhverjum sem kemur "ferskur" að verkinu. Þannig að ef einhver þarna úti hefur áhuga á að lesa mjög áhugaverða ritgerð um framburðarvillur hjá frönskumælandi Íslendingum þá endilega látið mig vita og ég sendi ykkur meistaraverkið mitt um hæl með tölvupósti. Ég get nú ímyndað mér fátt meira spennandi á sunnudagskvöldi en að lesa eins og eina fræðiritgerð á frönsku og leiðrétta málfræði- og stafsetningarvillur og koma með hugmyndir að betra orðalagi : )

Annars er planið fyrir daginn að halda áfram skrifunum (nú þegar komin ein ný síða!) því að ég er að fara að hitta leiðbeinandann minn í fyrramálið. Verð nú að viðurkenna að ég er pínu stressuð yfir því, hef ekkert hitt hana frá því við ræddum beinagrindina að ritgerðinni. Vona bara að henni lítist vel á þetta og láti mig ekki breyta allt of miklu. Svo er Anne vinkona mín að koma hingað á eftir til að hjálpa mér að greina framburðarvillurnar. Ég er búin að eyða mörgum dögum í að hlusta á það sem ég tók upp í jólafríinu og hljóðrita allt saman en jafnvel þótt ég sé búin að hlusta aftur og aftur á þetta allt saman þá er ég ekki alltaf alveg viss hvort það sé borið rétt fram eða ekki og því nauðsynlegt að fá smá aðstoð frá Frakka.

Jæja, þá vitið þið flest sennilega meira en þið höfðuð áhuga á að vita um þessa ritgerðarsmíði mína en vonandi hefur þessi pistill gefið einhverjum ákafa löngun til að fá að vita meira og lesa yfir hjá mér : )

fin des vacances

þá er alvaran tekin við á ný eftir gott grín undanfarnar 2 vikur. ég ætla að snara mér til fjalla innan stundar og vera þar fram að næstu helgi við allskonar snúninga.

og munið að öll dýrin í skóginum eiga að vera vinir...

GENF

við erum komin heim í kotið á ný eftir alveg magnaða helgi í Genf. Sviss tók vel á móti okkur með vegabréfaeftirliti og sólskini. helginni vörðum við svo í það að skoða, éta og djamma og ekki endilega í þessari röð!

þetta var í fyrsta skipti sem ég kem til sviss og mér fannst gaman að sjá muninn á frakklandi og sviss. þar var allt nútímalegra og svona pínu meira "glamúr" fannst mér. samt einhvernvegin svo líkt, en þó ólíkt.

heiðu þökkum við frábærar móttökur og hlökkum til að sjá hana hérna í grenoble þegar færi gefst.

GLEÐILEGT SUMAR

Já sumardagurinn fyrsti virðist vera á fleiri stöðum en á Íslandi því hér er sólin loksins farin að skína aftur, enda gesturinn farinn.

Í dag á að tékka á því hvort franskir hárgreiðslumeistarar kunna eitthvað fyrir sér. Það verður víst ekki umflúið mikið lengur að fara í klippingu en það hef ég aldrei gert hérna. Hef bara farið heima og svo hefur Mundi losað við mig slitna enda þess á milli. En nú á að fara á stofu. Verður spennandi að sjá hvernig til tekst.

Óska ykkur heima á Íslandi góðs frídags í sumarskapi!

komur og brottfarir

þá er stefán floginn til heimalandsins. þessi vika var allt of fljót að líða og eins og alltaf þegar fólk kemur þá var mikið gert og haft gaman af.

það stefnir hins vegar í framhald af slíku því að á föstudaginn verður haldið til Genf og helginni eytt þar hjá akureyrarmærinni heiðu, skólasystur svanhildar. að því loknu verður haldið til fjalla .

myndir frá einni af fjallgöngunum eru komnar í albúmið

ég skil hvorki upp né niður...

ég, stebbi og iaroslav skelltum okkur í smá bíltúr í dag til að skoða palais idéal. það er "draumahöllin" sem póstmaður nokkur byggði hér vestan við okkur fyrir tæpri öld. merkileg bygging sem markar upphaf súrrealisma í suður evrópu.

það sem ekki vekur minni athygli í dag er veðráttan. þvílíkt og annað eins - ég sem hélt að maður væri nálægt miðjarðarhafi!? þvílíkt rugl þetta er allt að verða... :-/

...kunnugleg stytta...

díses kræst - það snjóar - hvað er í gangi

Mont Rachais (1046m)

í dag var ráðist á garðinn þar sem hann var lægri - vegna veðurs. það er, eins og svanhildur skrifaði á dögunum, óbrigðult að þegar að við fáum gesti þá versnar veðrið. því betur fór ekkert að rigna að gagni fyrr en seinnipartinn og við stefán gengum því góðan hring í dag með viðkomu á mont Rachais (gluggatind eins og ég kalla hann). það er mun neðar en í gær og veður sæmilegt, smá úrkoma samt. við vorum ánægðir með sólarleysið, því að þegar við komum heim í gær komumst við að því að við vorum vel sólbrenndir í andliti. við erum því rauðhöfðar í dag - og forðumst ljósið eins og nátttröll.

á morgun verður gert hlé á gönguferðum vegna veðurs og hælsæra. góða helgi.

stefán á toppnum

Chamechaude (2082m)

það er helst að frétta héðan í dag að hæsti toppur Chartreuse fjallgarðsins var sigraður í dag. ég og stefán vippuðum okkur þangað upp og niður aftur á rétt um 5 tímum í erfiðu færi, hnjádjúpum blautum snjó mest alla leið. þetta var alveg æðislega gaman og sem svo oft áður verðlaunað með fallegu útsýni.

ég lofa myndaseríu í albúmið innan tíðar frá þessari fínu för.

verið að ná toppnum....

Nú er Mundi staddur á brautarpallinum að bíða eftir Stebba sem ætti að renna í hlað eftir örfáar mínútur. Því miður virðist hann ekki ætla að sleppa við álögin sem veðurguðirnir virðast hafa lagt á alla okkar gesti: spáir bara rigningu eins langt og spáin nær. Á þó að vera fínt á morgun svo að þeir félagarnir ná alla vega einni fjallgöngu. Ég þarf að fara í skólann á morgun og er það síðasti kennsludagurinn. Þetta er þó langt frá því að vera búið: endalaust mikið af stórum verkefnaskilum framundan og ég finn hvað ég verð pínu stressaðri með hverjum deginum sem líður, á eftir að gera allt of mikið og pressa á manni að standa sig vel til að komast áfram. Það á þó að taka frí frá lærdómnum þarnæstu helgi og fara í heimsókn til Heiðu í Genf. Ég hlakka mikið til!

Olía og sía

Volfgang fékk glænýja smurolíu og síu í gær. ég lagði honum upp á kantsteininn hérna fyrir utan, skreið undir og tappaði af honum gamla sullinu og setti á hann nýja og fína olíu. það hefur ekki farið af honum brosið síðan blessuðum. þegar ég var nú búinn að þessu þá leit ég í smurbókina og sá að það er akkúrat ár síðan ég skipti um olíu síðast, sem hljómar nú sem hreinasti trassaskapur, en hins vegar voru kílómetrarnir aðeins 7000! það er nú ekki mikill akstur á einu ári. úr þessu þarf að bæta snarlega.

að þessu loknu fékk ég mér stutta skemmtigöngu upp í bastillu. á leið minni rakst ég á þessi fiðrildi og þar sem ég hef ekki margt að segja, en mynd segir meira en mörg orð þá fær hún bara að flakka hérna með.

grátt

helgin sem var að líða var grár hversdaxleiki. í raun gerðist ekkert alla helgina. veðrið snérist úr sumri í vetur og mann langaði í raun ekkert út að gera eitthvað. það snjóaði í fjöllin og að mér skilst bara helling á skíðasvæðunum. en nú er sólin farin að skína á ný, þó svo að það vanti talsvert upp á að hitastigið sé orðið það sama og fyrir þetta hret.

á miðvikudaginn kemur Stefán málari frá Fornhólum í Fnjóskadal svo í heimsókn. hugmyndin var að taka nokkrar gönguferðir hérna í nágrenninu með honum.

rigning í grennd, og hér

því fer sem fer. hér er brostið á með loðdýradembu, hér rignir hundum og köttum. það er víst það albesta fyrir gróðurinn.

í svona veðri verður maður latur og nennir ekki að gera mikið, ég druslaðist samt í bæinn með þvottinn í morgun. vafraði milli bókabúða á meðan löðrið freyddi. kom heim með eina litla kilju sem ég ætla að kynna mér það sem eftir lifir dags.

góða helgi

meinhægt

það heppnaðist bara vel snæðingurinn í gær. jón var að vísu tímabundinn og gat ekki staldrað lengi við, en við hin gerðum fondúinu góð skil.

annars meinlætis dagur hérna hjá mér, mér líst verst á ef að - veðurspáin - á eftir að ganga eftir. ég trúi því bara ekki að það eigi að fara að koma næturfrost eftir ermalaust tímabil. :)

en skítt með það, myndirnar sem ég lofaði eru komnar á sinn stað í albúmið. smellið -> hér <- til að komast þangað á svipstundu.

éta það er það sem þeir geta - vinna það er minna

stutt var fjalladvölin í þetta skiptið og er það vel....

það kemur til af því að í kvöld ætla Georges hinn fjölþjóðlegi og Jóns hinn paríslenski að koma í kveldmat. ég hef grun um að það verði kveikt undir fondúpotti í tilefni af því og tekin fram flaska af eðalhvítvíni frá næsta héraði, Savoie.

myndirnar sem ég lofaði verða því að bíða morgundax eða föstudax - fylgist með.

Góð helgi

þetta hefur verið viðburðarík og skemmtileg helgi. í gær fórum við til Lyon í borgarferð. við tókum lest um morguninn, reyndar ekki þá sem við óskuðum en henni var aflýst vegna verkfalls. við fengum lest aðeins seinna og vorum í Lyon rétt fyrir hádegið. svo eyddum við deginum í svona týpískan túrisma, löbbuðum um og skoðuðum og fengum okkur að borða. virkilega fínn dagur. skoðuðum meðal annars Basilique Saint-Jean en hana má sjá hérna á neðstu myndinni.

í dag skelltum við okkur svo upp á eitt fjall. það er nú alveg nauðsynlegt að fara á eitt þannig við og við. þetta skiptið þurfti nú ekki mikla líkamlega þjáningu við að komast í útsýnið því vegur liggur því sem næst alla leið upp. síðustu metrana upp að virkinu Fort Saint-Eynard sem er á toppnum fer maður svo fótgangandi.

ég ætla að reyna að setja inn myndir í albúmið seinni hluta vikunnar, því að í fyrramálið verður farið til fjalla....

Fjalla-kallinn og Belledonne í baksýn

Lyon í gær

Fögnuður

Það er sko aldeilis búið að fagna heimkomu bóndans sem og bóludauðans. Við vorum að koma heim eftir að hafa farið út að borða með Daníel og Kelit. Fórum á stað sem sérhæfir sig í réttum frá Máritaníu (segir maður það ekki annars á íslensku, eyjan heitir Ile Maurice á frönsku) og fengum alveg æðislega góðan mat. En það var nú bara byrjunin á góðu kvöldi því eftir matinn skelltum við okkur í tívolí og fórum í alveg brjálað tæki. Svo var tekinn einn bjór á heimleiðinni, bara setið úti og spjallað í sumarblíðunni.

En skemmtuninni er langt frá því að vera lokið. Á morgun er stefnan tekin á Lyon svo það er víst best að fara að koma sér í háttinn til vera ferskur í fyrramálið og leggja snemma af stað.