lágskýjað en sól í grennd

magnaður skíðadagur hér hjá okkur. ekki var nú samt mikið skyggni neðst í brekkunum en þá hélt maður sig bara skýjum ofar í sólinni. það eru nett þreyttir þrímenningar sem eru að fara út að borða á "au fin gourumet" núna með henni svanhildi.

Kominn tími til að blogga smá

Já það er ansi langt liðið frá því ég skrifaði síðast en það hefur bæði verið mikið að gera og frá litlu að segja. En nú hef ég frá nógu að segja og því best að hefjast handa.

Í síðustu viku reyndi ég að vera dugleg að læra til að geta tekið mér frí um helgina og það gekk alveg ágætlega, alla vega kíkti ég ekki í bók alla helgina. Torfi og Eva komu hingað seinni partinn á föstudaginn og svo Jón og Guðrún seinna um kvöldið. Þá var spjallað og drukkið smá rauðvín og snædd jarðaber með súkkulaði. Svo var farið eldsnemma á fætur á laugardaginn og skíðað allan daginn í glampandi sól. Alls ekki amalegt það! Þegar heim var komið skrapp ég upp á hæðina fyrir ofan til að spjalla við fólkið sem býr þar en þau voru búin að bjóða mér smá vinnu við að hjálpa syni þeirra með heimalærdóminn. Að lokum sömdum við um það að ég mun koma og hjálpa honum tvisvar í viku, klukkutíma í senn. Ég byrja á morgun og verður spennandi að sjá hvernig þetta gengur. Eftir "atvinnuviðtalið" borðuðum við raclette, drukkum rauðvín og spiluðum Sequence. Það var mikið fjör og mæli ég með þessu spili við alla sem finnst gaman að spila.

Gærdagurinn fór svo í almenn rólegheit. Við röltum aðeins um bæinn, fórum á kaffihús og fengum okkur ís í kuldanum, fórum heim og horfðum á vídeo, spiluðum Leonardo, Matador og Kana fram að háttatíma. Svo var farið eldsnemma á fætur í morgun og krakkarnir fóru á skíði en ég í skólann. Já það er ekki alltaf tekið út með sældinni að vera námsmaður og víst best ég fari að halda áfram að læra svo að ég geti tekið mér frí á miðvikudaginn og farið með á skíði.

nývaknaður

...og farinn á skíði

meira seinna.

:)

daglegt amstur

þegar fátt er að frétta er talað um veðrið.

hér er búið að snjóa hvern einasta dag í rúma viku. suma daga lítið aðra daga meira. það hefur líka verið býsna kalt, og svo rammt kveður að að þjóðverjinn í herberginu við hliðina á var að botnfrjósa svo að í gær var hækkað á kyndingunni. bjarta hliðin á þessu að spáin fyrir fjöllin er góð og skíðaveður á að verða með ágætum frá og með morgundegi. annaðkvöld koma svo Torfi og Eva og hver veit nema parísarbúarnir láti sjá sig líka - en það á eftir að koma í ljós.

já svona líður lífið áfram - volfgang kominn í fullt form á nýjan leik og mér ekki til setunnar boðið. verð að fara að drífa mig í brúnu flaujelsbuxurnar, köflóttu skyrtuna og ullarvestið og setja rauða snýtuklútinn í rassvasann, já þórður húsvörður er farinn af stað, hér er lek vatnslögn.

ROGER - over and out

farir ekki sléttar....

uss uss uss hvað er nú eiginlega að gerast hérna í frans??? hér er allt í kalda koli í dag. eiginlega byrjaði þetta í gær í búðinni með því að bíllinn var að stríða okkur. svo inn í búðinni þá tókst mig að skera mig á pappírnum sem nýji fondúpotturinn okkar var og er pakkaður í.

þetta blessaðist nú allt giftusamlega og þegar heim var komið fór ég í það að afísa ískápinn okkar. hann er gamall og hurðin skökk á lömunum svo hann er fljótur að fyllast af ís. þar sem ég kraup á flísalögðu gólfinu fyrir framan íssskápinn við iðju mína þá setti ég gat á annað hnéð á uppáhalds gallabuxunum mínum. það þarf semsagt að kaupa nýjar þannig.

svo lauk þessum annars ágæta degi. í morgun vaknaði ég svo á undan hananum til að halda til fjalla. en þá kom nú babb í bátinn. nú harðneitaði volfgang gangsetningu. varð eiginlega bara að volf-ekkí-gang. þetta í morgun ásamt því í gær lýsti sér sem straumleysi af einhverju tagi, kannski ekki leysi, - en lítið var um rafmagnið. ég ákvað því að fara í hinn enda bæjarins með sporvagninum til að ná í nýtt batterí í greyjið. auðvitað tókst mér hálfsofandi að klúðra því ferðalagi með því að gleyma að skipta um spor með sporvagninum og fattaði það mátulega of seint. þess vegna fékk ég hálftíma auka skoðunarferð um grenoble eldsnemma í morgun. á endanum fékk ég þó batteríið og fór heim og skipti um. allt rauk í gang. allt í einu mundi ég að rússinn sem býr með okkur hérna á svona græju til að mæla rafmagn með. ég bankaði hjá honum og vakti og fékk mælinn. þá komst ég að því að sennilega hefur ekkert verið að þeim rafgeymi sem var í bílnum heldur hlóð bíllinn ekki.

þar með gafst ég upp og fór og talaði við vin minn á verkstæðinu hérna við hliðina á. hann pantaði fyrir mig nýjan alternator og ætlar meira að segja að vera svo vinalegur að skipta um hann fyrir mig á morgun.

ég hringdi því í gonna og sagði honum mína raunasögu. við urðum sammála um það að best væri að bíða þar til allt væri komið í lag. ekki væri nú betra ef dósin bilaði í fjöllunum. við sammældumst svo um að ég mundi laga smá flísalögn hérna niðurfrá í staðin. ég var passlega búinn að leggja símann á þegar ég uppgötvaði að öll mín verkfæri eru uppfrá!!! alger skita!

þegar mér svo datt í hug að deila þessum annars skondna óhappasólarhring mínum með ykkur - þá virkar ekki heimasíðan, Daia systir "vefstjórinn minn" segir engu líkara en einhverjir ódámar hafi hakkað sig inn á kerfið og sett allt í rúst. það er huggun harmi gegn að vita það að ef að einhver getur leyst það mál þá er það hún Daia mín.

jæja - eldfjallið búið að blása.... ég er bara farinn að sofa, ég þori ekki að hreyfa mig af hættu við það að beinbrotna... góðar stundir

Hvað haldiði að ég sé gömul?

Ég hef nákvæmlega ekki frá neinu að segja en er farin að hafa áhyggjur af því að ég sé að bregðast dyggum lesendum, þoli nefnilega ekki sjálf þegar ég hleyp í gegnum síður allra vina minna (og allra hinna) í von um að alla vega einhver sé búinn að blogga frá því ég gáði síðast (einum til tveimur klukkutímum áður) en enginn er kominn með nýja færslu. Ákvað því að taka þetta skemmtilega próf sem ég fann á síðunni hennar Bjarkar og svo ákvað ég að stela hugmyndinni hennar. En allavega, ef þið voruð í vafa um hvað ég væri gömul þá vitið þið það núna og getið jafnvel komist að ykkar egin aldri.

enn um snjó

enn kyngir niður snjó hér í grenoble eins og sjá má ef bornar eru saman myndir frá gær og í dag. sem áður finnst mér það hið besta mál en þó er sá galli á gjöf njarðar að ég ætla til fjalla í dag og ég veit bara ekki hvað honum volfgang mínum finnst um það því hann er jú bara á sumarskónum. ætli ég bíði ekki átekta og hafi samband við gonna á eftir, hann er hérna núna en er að fara heim á eftir. hann er á vetrardekkjum og með keðjur!!!

annars ágætur dagur í gær, ýmsir snúningar framkvæmdir og svo hittum við Anne skólasystur svanhildar í gærkvöldi en sú átti afmæli. hún bjó á íslandi í eitt ár og var ofsahrifin. fyndið þegar maður talar við hana að hún er búin að fara gersamlega út um allt á íslandi, held ég bara á fleiri staði en ég, - á meðan við erum sennilega búin að sjá meira af frakklandi en hún!!! eða svona þannig.

er þetta ekki einmitt feillinn sem allir gera, - gleymir maður ekki allt of oft að vera bara túristi í sínu eigin landi...?

mánudagur í frans

svona lítur það þá út núna. fjallið fyrir utan gluggann okkar orðið hvítt hér er búið að rigna og snjóa síðan ég kom á föstudaginn. þetta er hið besta mál.

annars ágæt helgi að baki og önnur vika í fjöllum framundan, en þangað fer ég á morgun. við fórum í bíó í gærkvöldi að sjá Aviator. alveg hreint ágæt mynd þar á ferð þó svo að ég skilji nú samt ekki alveg allar þessar verðlaunatilnefningar. en í dag ...snúningar...

heyrðu þetta er að virka

heyrðu þetta er að virka !!! þá er bara að halda áfram að koma þeim upplýsingum inn á harða drifið sem eiga að vera þar. Víííííí........

nýr harður diskur

þá ætlar kallinn að fara að vaða í það að endurnýja örlítið tölvugarminn. hún er eiginlega alveg að koxa aumingja vélin okkar en ég vona að nýr harður diskur gleðji hana og endurnæri.

ef ekki verður komin færsla hérna innan 3 daga þá hefur eitthvað mistekist!!!

bless á meðan.

smá fjallasaga

hæ hæ - þá er maður kominn til byggða eftir ágæta törn í fjöllunum. það var ýmislegt gert þar, allskonar smíðavinna, málun og júhú- ég lagði rafmagn!!! nú eru einhverjir hlæjandi því engann mann þekki ég sem er hræddari við rafmagn en ég er. en ég komst að því að þetta er allt í lagi þegar maður er að leggja svona "nýtt rafmagn", þá er maður viss um að hinn endinn er ekki tengdur. eða er það ekki?? :)

í fjöllunum var frábært veður, eiginlega of gott því snjórinn lak af húsþökunum. það gladdi mig því mikið að það var farið að snjóa núna áðan þegar ég yfirgaf pleisið. mynd af því hérna fyrir ofan. annars hef ég lítið að segja - engar stórar fréttir af fjöllum. góða helgi

gamla húsið sem verið er að gera upp

Vetrarfrí

Nú er ég komin í vetrarfrí sem er nú reyndar ekki frí að öðru leyti en því að það er ekki kennt í næstu viku. En það gefur mér tíma til að vinna í verkefninu mínu og kannski til að skreppa einu sinni eða tvisvar á skíði. Fór allavega í dag og keypti mér skíðapassa til vonar og vara. Hér er búin að vera glampandi sól og 10 stiga hita í tvær vikur og snjórinn farinn að hverfa úr fjöllunum. En sem betur fer á að snjóa í fjöllin (rigna hér) frá og með morgundeginum og eins langt og spáin nær. Það verður því sennilega ekkert farið á skíði um helgina en væri ekki amalegt að skella sér þegar sólin kemur aftur og nóg af nýföllnum snjó!

Ég er búin að vera ótrúlega dugleg í dag og í gær og er búin að klára öll verkefni sem á að skila í vikunni eftir fríið svo að ég geri mér vonir um að komast almennilega af stað með þetta blessaða verkefni mitt. Það á eftir að taka sinn tíma að hljóðrita allt sem ég tók upp í jólafríinu, greina villurnar og svo skrifa 50 til 80 blaðsíður um þetta allt saman. En þetta gildir 1/4 af lokaeinkunn svo það er eins gott að gera þetta vel. Annars fékk ég síðustu einkunnina mína í dag og ég get ekki annað en verið ánægð með þessar einkunnir sem ég er búin að fá. Einkunnirnar hjá öllum eru hengdar upp á vegg svo maður getur séð hvar maður stendur miðað við hina í hverju fagi en það er hins vegar svolítið erfitt að átta sig á því hvar maður stendur nákvæmlega miðað við hina þegar maður þarf að leggja saman einkunnirnar úr hverju fagi og hvert fag gildir mismikið og svona. En mér sýnist ég vera á meðal 30 efstu í öllum fögum nema einu (helv... prófið sem ég klúðraði) svo að mér sýnist ég eiga ágætismöguleika á að komast áfram ef ég stend mig vel þessa önn.

En nóg um lærdóm og einkunnir. Nú er ég á leiðinni í partý!

Gallup

Maður er rétt búinn að tengja síma í herbergið og Gallup strax byrjaður að hringja. Sat hér í rólegheitum við tölvuna og var að skrifa ritgerð þegar síminn hringdi. Þetta var reyndar í annað skiptið sem síminn hringir í dag og í bæði skiptin veðraðist ég upp, handviss um að þetta væri mamma. En það var ekki svo gott; í fyrra skiptið var þetta vitlaust númer og nú áðan var það Gallup að gera könnun fyrir bankann minn hér í Frakklandi. Mér fannst þetta nú ekki sérlega spennandi könnun en samþykkti engu að síður að svara spurningunum. Hefði betur sleppt því þar sem á eftir fylgdu ábyggilega hundrað spurningar um eitthvað sem ég hafði enga skoðun á. Datt ekki í hug að það væri hægt að búa til svona langan spurningalista um þjónustu banka. Við öllum þessum spurningum gat ég valið um eftirfarandi svör: mjög sátt, frekar sátt, frekar ósátt, mjög ósátt. Held ég hafi alltaf sagst vera frekar sátt svo að eftir þetta símtal get ég sennilega dregið þá ályktun að ég sé frekar sátt við bankann minn! Hins vegar er ég ekki sátt við það hvað hraðbankarnir eru oft tómir (sem er slæmt þar sem hér eru engir gjaldkerar heldur bara hraðbankar) og var alltaf að bíða eftir spurningu um það til að geta sagst vera mjög ósátt en að sjálfsögðu var ekkert spurt um það.

aftur orðin ein í kotinu

Já Mundi bara rétt kominn og farinn aftur. Það þýðir að planið næstu daga hjá mér er lærdómur og meiri lærdómur enda veitir víst ekki af. Maður má ekkert slaka á ef maður ætlar að ná að verða einn af 25 hæstu og ég er orðin nett stressuð yfir að vera ekki komin lengra af stað með rannsóknarverkefnið mitt. Stefni því að því að vera mjög dugleg næstu 3 daga allavega, svo kannski einn dag í pásu þegar Mundi kemur aftur en svo bara aftur að læra. Reyndar var verið að bjóða mér í partý á fimmtudagskvöldið og auðvitað mun ég fara í það, ekki það oft sem mér er boðið í partý hjá öðrum en hér á hæðinni, en þetta er hjá stelpu í skólanum.

En já sem sagt, lærdómur með partýpásu. Er það ekki bara hið fínasta plan?

uppgjör helgarinnar

helgin hér í grenoblehreppi var öll hin ágætasta. það var verslað, snæddur góður matur og við hérna á hæðinni fórum saman að skemmta okkur á laugardaginn. allt gott.

ég fór í bæinn á laugardaginn meðan svanhildur var að læra. þar var mótmælaganga og múgur og margmenni. hér í landi eru mikil mótmæli núna vegna þess að franska ríkisstjórnin hyggst hreyfa við vinnulöggjöfinni. ég skellti mér með og söng maístjörnuna og veifaði rauðum fána. fátt eflir meira andann en að mótmæla aðeins... hahaha... nei, ég var bara að plata. ég var nú bara áhorfandi á hliðarlínunni í þetta skiptið.

á morgun fer ég svo til fjalla og kem sennilega ekki aftur til byggða fyrr en á föstudaginn, en það er þó óráðið.

á skíðum skemmt ég mér

Frábær skíðadagur að baki hér hjá okkur í grenoble. Glampandi sól og ekki ský á himni í allan dag. skíðafæri einnig eins og best verður á kosið. Ég ætla svosem ekki að segja meira um þetta en spánýjar myndir má nálgast í myndaalbúminu hér til hliðar.

ég henti líka þar inn myndum frá gönguferðinni sem ég fór með norska tengdasyni gonna upp að lac des quirlies í nóvember. betra seint en aldrei er það ekki...!

góða helgi.

farin

skömmu eftir að færsla gærdagsins datt inn fór ég að laga skíðin, bræða í rispur og bera undir. fína gufustraujárnið mitt er þá loksins komið með hlutverk!! svo var tekin fram þjöl og kantarnir skerptir. nú er allt klárt, kakóið að komast á brúsann og volfgang fékk skíðabogana í gær.

farin á skíði - góða helgi.

um daginn og veginn

það var mikið málað í gær. dagurinn í dag hefur hins vegar liðið áfram átakalítið en með talsverðum framkvæmdum. það er nefnilega ekki svo auðvelt að búa á 15 fm með allt þetta dót sem manni fylgir. maður er sennilega ekki sá nægjusamasti, mér finnst alveg ómögulegt að hafa ekki allt til alls og ég held að ég hafi nú umþaðbil næstumþví flest hér í þessum klefa. því þarf allt að vera skipulega upp sett.

ég tók því smá törn í dag og endurskipulagði, kom hlutum í kassa sem ekki eru í notkun og setti þá upp í hillu. öðru var umstaflað og sumu hent. að lokum létt þrif.

ég skrapp líka í bæinn og keypti nýjan harðann disk í tölvuna. ég ætla að skipta um hann við tækifæri. ég set nú inn færslu áður en ég fer í það - ef að það skyldi nú verða síðasta færslan!! :)

annars rjómablíða sól og næs - stefnir allt í skíðaferð í les7laux á morgun og svo í les2alpes á laugardaginn.

Fönn fönn fönn fönn frönsk fönn

já þá hefur tæknin hafið innreið sína í frakkland. já góðir gestir, er'ekk allir sestir!VIÐ ERUM KOMIN MEÐ SÍMA!!!! við tengdum monstersímann sem við fengum gefinn á íslandi og okkur til furðu þá virkaði allt strax, án allra adsl filtera og vesenis. þannig að nýtt símanúmer hjá okkur er því 0033-476-42-30-94. nú er semsagt hægt að hringja beint hingað í klefann okkar, það þarf ekki lengur að hringja í sameiginlega símann frammi á gangi.

annars tekur frakkland vel á móti mér. hér í grenoble var kalt en logn þegar ég kom í gærkveldi. í nótt hefur hins vegar snjóað það mikið að það hefur náð að festa á götunum og hér er nú hálka og snjór yfir öllu. þetta er semsagt meira en við höfum séð hér áður og enn er að snjóa. frábært húrra húrra segi ég - nú fyllast fjöllin af "fönn fönn fönn". þetta eru gleðifréttir fyrir okkur og ekki síður þá góðu gesti sem hér ætla að reka inn nefið í lok þess mánaðar sem hófst á miðnætti síðastliðnu.

annars á ég von á gonna vini á hverri stundu, hann er að koma með mál og kítti því það er einn klefinn hérna sem þarf að eiga skyndikynni við mig í dag og á morgun því við erum að fá nýjan þjóðverja í stað þess er fór í úreldingu til parísar fyrir helgi, hann hagen er nefnilega því miður farinn.

svo ætla ég að fara að vinna í því að setja inn myndir, það hefur safnast upp heill hellingur og það þarf að fara að gera eitthvað í því, en ég lofa engu fyrr en undir helgi með það.

ég mun svo breyta heimasímanúmerinu hérna til hliðar í dag eða morgun svo að þið getið nálgast það þar.