Danmörk kvödd að sinni

þá er síðasti heili dagur danmerkurdvalar að kvöldi kominn. á morgun ætla ég svo að ferðast 1500km til suðurs áleiðis til svanhildar.

á hádegi í dag fórum við í frokost hjá margit nágrannakonu. að því loknu fórum við í smá bíltúr hérna um jóska hálendið. niður til kolding, upp til vejle og um sveitirnar umhverfis. þar mátti víða sjá ummerki óveðursins sem hér fór yfir ekki alls fyrir löngu. þeir eiga nógan eldivið núna jósku bændurnir. sumir eiga hins vegar eitthvað minna af húsþökum.

næsta færsla verður svo frá frakkandi - lifið heil

skemmtilegt djamm

Var að koma heim af svona líka fínu djammi. Langaði bara að láta ykkur vita af því og prufa að blogga pínu full. Verð nú að viðurkenna að það er pínu erfitt að finna réttu takkana á lyklaborðinu. En það var sem sagt mjög gaman í kvöld. Annars lítið annað að frétta eftir daginn.

rólegheit í baunalandi

hér í höfuðborg legókubbanna gengur á með éljum í dag. í augnablikinu er uppstytta og smáfuglarnir hakka í sig brauðið sem við keyptum á miðvikudaginn hérna hjá hérastubbi og bakaradrengnum.

í morgun fór ég og náði mér í flugmiðann minn til parísar, hann þurfti ég að nálgast á flugvellinum og til að forðast það að lenda í röð á ögurstundu þá renndum við feðgarnir í þetta verkefni í morgun. annars erum við bara að bíða núna eftir því að danska sjónvarpið sýni leik íslenska liðsins á HM í túnis. mér skilst að það byrji leikur eftir um klukkustund.

ég ætla að fá mér saltstangir með honum.

Vonbrigði

Það hefur nákvæmlega ekkert gerst hjá mér í dag. Er bara búin að vera að læra og hlustaði á leikinn og það sem dró helst til tíðinda í dag er að Daníel bauð mér yfir til sín að drekka kaffi og við spjölluðum um orkumál. Mér fannst því nauðsynlegt að gera eitthvað í kvöld en enginn hér á hæðinni ætlaði að gera neitt svo að ég hringdi í stelpu sem er með mér í skólanum og spurði hana ekki hvort hún væri til í að kíkja aðeins út í kvöld. Hún var sko til í það og ég varð voða ánægð, setti tónlist á fóninn, opnaði bjór og fór að rembast við að renna stígvélunum mínum upp mína feitu kálfa. Er rétt búin að klæða mig í gallan og á leiðinni að fara að mála mig þegar hún hringir og kemst ekki út í kvöld. Stefnir því í rólegt kvöld yfir afleitu sjónvarpsefni. Það er samt bót í máli að við ætlum í bæinn annað kvöld í staðinn en ég er samt pínu svekkt að þurfa að láta mér leiðast í kvöld. Veit ég fór að djamma í fyrradag en mér er farið að leiðast óendanlega mikið að vera hérna ein og þrái að gera eitthvað skemmtilegt með öðru fólki á kvöldin. Ég hlakka voða mikið til að fá hann Munda minn til mín á mánudaginn.

nord-jylland

föstudagur og túr um norðurjótland. enn var sá gamli að útrétta fyrir íslendingafélagið. þetta var hin ágætasta ferð með léttum snúning og fjallgöngu við ringköbing fjörðinn. ágæt upphitun fyrir alpana. að vísu smá hæðarmunur á fjöllum, en ekki svo mikill er það? það var allavega fallegt útsýnið af þessum hól, haf og strönd og stöku sólargeislar inn á milli.

núna er fleskesteg i ofninum hjá frú margréti og allt gott....

rauðmagar

þá flokkast maður ekki lengur með mönnum. sennilega er ég kominn inn í kvótakerfið og flokkast með rauðmögum. jesús hvað maginn á mér er rauður. ég huxa að það lýsi af mér í myrkri.

annars góður dagur að baki hér í mörk, fórum til þýskalands í dag að gera innkaup fyrir þorrablót íslendingafélagsins sem er eftir rúma viku. það dugði ekkert minna en tengivagn aftan í steisjoninn. alvöru innkaup. svo var komið við á heimleiðinni hjá ambassadornum bjarna og hans ektafrú.

það sem eftir lifir dax ætla ég að taka það rólega með aftersönn :)

Miðrarvikudjamm

Við Hagen, Daniel og Kelit fórum á Couche Tard í gærkvöldi og það var mikið stuð. Vorum mætt á staðinn um hálfellefuleytið og þá var byrjað á að panta bjór á barnum og svo farið út á dansgólfið og við settumst aldrei niður heldur bara dönsuðum og dönsuðum og sungum fram til klukkan hálftvö. Ég á eftir að sakna þess þegar ég flyt aftur til Íslands að það sé ekki hægt að fara út að dansa alla daga nema sunnudaga. Hér skiptir engu máli hvaða dagur er (sunnudagar eru ekki taldir með), það er alltaf stuð í bænum. Það var sem sagt mikið stuð á Couche Tard og þar hittum við líka Róbert sem býr á neðri hæðinni og Róbert sem er að fara að flytja hingað, einmitt í herbergið hans Hagens. Þannig að þið sjáið að það eru bara allir á djamminu á miðvikudagskvöldum. Að vana ákvað Hagen að halda skemmtuninni áfram á Vertigo (diskótek) og þrátt fyrir að ég væri í miklu stuði, búin með nokkra bjóra og búin að syngja og dansa eins og brjálæðingur, þá ákvað ég að vera skynsöm og fara heim með Daniel og Kelit þar sem ég þurfti að mæta í skólann í morgun klukkan 8:30. Og það gekk svona líka vel, bara þambað vatn og tekin ein verkjapilla fyrir svefninn og frekar lítill hausverkur í morgun. Þá var það bara aftur fullt af vatni og ein verkjapilla og klár í skólann. Verð samt að viðurkenna að ég er ansi þreytt núna og ætla að leggja mig aðeins. A plus.

mistök

stundum mistekst manni. foreldrar mínir tjáðu mér í gær að hér í bænum billund væri eðal sólstofa. mér datt í hug að notfæra mér sæluna og baða mig sólu í norrænu skammdegi.

ekki vildi betur til en svo að eitthvað misskildi ég leiðbeiningar foreldranna. þetta eru víst eitthvað tjúnnaðir bekkir hérna í baunalandi og ég fór óvart í tvöfaldann tíma sem var þó ekki nema 12 mínútur.

nú er maður eins og rassskelltur karfi á allann skrokkinn og makar sig í feiti til að lina þjáningarnar!! hahaha.... já það er ekki tekið út með sældinni að vera súkkulaðisætur sólstrandargæi eins og ég.

Fermingargjöf

Ég vaknaði fyrir allar aldir í morgun við fulla þvagblöðru og tókst engan veginn að festa svefn aftur eftir tæmingu. Dreif mig því snemma á lappir en nennti samt ekki að byrja að læra strax. Hékk því aðeins á netinu þangað til að klukkan fór að nálgast níu en þá opna búðir hér. Ég hef ekkert kíkt á útsölurnar hérna og hef svo sem ekki hug á að gera það þar sem mig vantar ekki neitt, nema jú, fann eitt sem ég gæti kannski keypt á útsölu: fermingargjöf handa bróður mínum. Fann mér því afsökun fyrir að fara í búð, jafnvel þótt enn séu nokkrir mánuðir í að Gauti fermist. Maður á nú kannski ekki að vera segja frá því að maður kaupi gjafir á útsölu en ég ætla samt að segja ykkur frá því að ég fann þessa frábæru gjöf handa bróður mínum á góðum afslætti. Annars skammast ég mín svo sem ekkert fyrir að hafa keypt gjöfina á útsölu, ef það sem ég keypti hefði ekki verið á útsölu þá hefði það verið of dýrt og Gauti hefði fengið minni gjöf fyrir vikið. Mér sýnist því allir græða, þ.e. við Mundi og Gauti. Verst að þetta er svo rosalega stór pakki (ég er að reyna að gera Gauta spenntan) að það mun ábyggilega kosta jafn mikið að senda hann heim og ég borgaði fyrir hann í búðinni og ég get varla farið að troða gjöfinni á tilvonandi gesti þar sem gjöfin er ansi plássfrek. En það er allt í lagi, litli bróðir manns fermist nú ekki nema einu sinni og verður maður ekki að gefa flotta gjöf þegar maður getur ekki verið viðstaddur? Það held ég nú.

Annars er nákvæmlega ekkert að frétta. Búið að snjóa pínu og vera kalt en það er bara fínt því þá verður gott skíðafæri. Svo hlustaði ég auðvitað á leikinn í gærkvöldi og er jafn svekkt og aðrir Íslendingar en svona er þetta nú bara.

Það stefnir þó allt í djamm hjá mér í kvöld. Hagen er að flytja til Parísar næstu helgi og kvöldið í kvöld er síðasta kvöldið sem hann hefur til að djamma í Grenoble sökum prófa og heimsóknar móður. Held því að hæðin ætli saman á Couche Tard í kvöld.

Jamm og jæja, ætla að fara að læra.

flugdónar

þá er kallinn kominn í hús í mörkinni. eftir ansi skrautlega flugferð. fyrst var smá ókyrrð í lofti og svo var nefnilega kolvitlaus flugdóni um borð í vélinni líka. sú var að gera allt vitlaust, ælandi og öskrandi um alla vél. neitaði svo að setjast þegar lent var og var með almenn mótmæli. hennar biðu nokkrir lögregluþjónar þegar vélin var opnuð.

annars lofar mörkin góðu, hér er reyndar kalt en ég er með nóg af hlýjum fötum. hér ætla ég að eyða nokkrum góðum dögum áður en ég sný "heim" til frans.

að lokum langar mig að þakka öllu skemmtilega fólkinu á íslandi fyrir góðar stundir.

....meira seinna...

Áfram Ísland

Að sjálfsögðu hlustaði ég á Adolf Inga lýsa leiknum áðan á Rás 2. Eins og öðrum Íslendingum leist mér ekkert á þetta framan af og átti svo sem aldrei von á því að "strákarnir okkar" gerðu einhverjar gloríur á þessu móti og var farin að spurja sjálfa mig af hverju ég væri samt alltaf að halda í trúna á að við gætum eitthvað í handbolta. En vááá hvað ég var að deyja úr spenningi síðustu 5 mínúturnar, var farin að öskra þegar þeir skoruðu og líka þegar það var varið og líka þegar Tékkarnir skoruðu. Var sem sagt síöskrandi hérna inni í herbergi og það endaði með því að Daníel kom til að athuga hvort það væri ekki allt í lagi hahahha. En þetta jafntefli gerði sem sagt alveg daginn fyrir mig og nú bíð ég bara spennt eftir þriðjudagskvöldinu og hef að sjálfsögðu fulla trú á að við vinnum þann leik :) Auðvitað ætti maður nú bara að skella sér til Túnis, kostar bara 30.000 kall flug og hótel í viku. En nei annars, tel mér frekar trú um að ef ég myndi mæta á svæðið þá myndu þeir örugglega tapa og ferðin verða hundleiðinleg. Ég held því bara áfram að hlusta á hann Adolf minn og öskra: Áfram Ísland!!!

Enga flensu hér takk

Jæja þá er komið að þriðja bloggi dagsins. Þið verðið bara að þola ruglið í mér. Málið er að þegar ég er svona alein í Frakklandi þá hef ég ekkert marga að tala við, bara tala svona aðeins við krakkana sem búa hérna og svo bara krakkana í skólanum þegar það er skóli. En nú hef ég ekki farið í skólann frá því á þriðjudag (kennsla féll niður í gær sökum verkfalls, sem ætti nú ekki að koma fólki á óvart þar sem ég bý í Frakklandi) svo að ég verð bara að fá að rausa hérna og endilega verið dugleg að kommenta því þá er næstum því eins og ég sé að eiga samræður við fólk en ekki bara að tala út í tómið.

Ég er nú bara búin að vera nokkuð dugleg að læra í dag en nenni ómögulega að gera meira í kvöld og ákvað því að kíkja á imbann en þar var ekkert áhugavert að sjá svo að netið varð fyrir valinu. Annars er það helst að frétta héðan af 7 rue Ernest Calvat að hún Kelit var að kaupa sér balldress fyrir galaball sem verður annað kvöld fyrir nemendur skólans sem hún og Þjóðverjarnir eru í. Þetta væri nú svo sem ekki frásögufærandi nema fyrir þær sakir að þetta galaball er búið að vera að valda henni hugarangri í nokkrar vikur þar sem fínn klæðnaður er skylda og hún átti engan kjól og ekkert pils. Eigandi tugi kjóla og nokkur pils inni í skáp og í kössum á Sauðárkróki (og það þrátt fyrir að hafa gefið Hjálpræðishernum fullan ruslapoka af kjólum) var mér nánast ómögulegt að skilja hvernig stelpan hefur komist af í gegnum tíðina. Ég hélt að allir ættu alla vega ein spariföt til að vera í á jólunum. En helsti munurinn á okkur tveimur er nú sennilega uppruninn, þ.e. að ég kem frá Íslandi, þar sem enginn sér neitt óeðlilegt við það að eiga yfirfullar geymslur af drasli sem aldrei er notað, en Kelit kemur frá Perú og allar hennar eigur komast fyrir í skottinu á bíl. En það var sem sagt bankað á hurðina hjá mér í dag og þegar ég opnaði stóð Kelit á ganginum í nýju síðu pilsi og topp alveg að springa úr hamingju yfir nýju fötunum sínum. Það alveg geislaði af henni gleðin og hún var alveg ofsalega fín og sæt. Hún var víst búin að ganga búð úr búð að reyna að finna eitthvað sem gæti passað inn í fjárhagsáætlunina og fann loksins þetta á góðu verði á útsölu. Það var alveg yndislegt að sjá hana, hún var svo ánægð, og á meðan ég er þakklát fyrir að hafa alist upp við betri aðstæður en hún hefur þurft að gera þá velti ég því líka fyrir mér hvort maður hafi haft það aðeins of gott og gleymi því hvað maður hefur það í rauninni gott og vill alltaf meira. Ég meina, mér finnst alltaf voða gaman að kaupa mér nýjan kjól en ég held ég hafi aldrei upplifað það sama og Kelit upplifði í dag. En alla vega, ég vildi bara deila með ykkur hamingjunni sem ég varð vitni af í dag og minna ykkur á það hvað við erum heppin, því það er jú bara heppni hvar maður fæðist í heiminum.

En nóg um það. Annað sem ég get sagt ykkur frá er að í dag er ég búin að hafa það óþægilega mikið á tilfinningunni að þessi helv... flensa sé að reyna að taka sér bólfestu í mér. Ég er skíthrædd við þessa flensu, sérstaklega eftir að ég frétti að hún hefði náð að sigra ónæmiskerfi karls föður míns en ég held að þau kerfi sem við ónæmi eru kennd gerist ekki mikið sterkari en hjá honum. En ég er sem sagt búin að finna fyrir einhverjum smá skít í hálsinum í dag og er því búin að bæta við daglega vítamínpakkann sem inniheldur lýsi, c-vítamín, spirulina og fólínsýru (vil taka það fram að ég hef ekki hugmynd um hvað þessi fólínsýra gerir en mamma gaf mér krukku af henni og sagði að hún væri mjög mikilvæg fyrir konur á barneignaraldri og þar sem ég er nú góð stúlka þá hlýði ég mömmu og tek þetta samviskusamlega inn með morgunmatnum) og í dag var bætt við ólífulaufspillum, propolis-og sólhattsdropum og ég eldaði kvöldmat sem innihélt hvítlauk, engifer og mikið af hollu grænmeti og í þessum töluðu (eða skrifuðu) orðum er ég að drekka kaffi og koníak. Hlýt því að vakna eldhress í fyrramálið.

Þá er fréttapistlinum frá 7 rue Ernest Calvat lokið í dag en ég veit þið bíðið öll spennt fyrir pistli morgundagsins!

sendu karlinn í leikfimi

Blómaval er búið að vera að auglýsa í útvarpinu í allan dag að konur eigi endilega að koma mönnunum sínum skemmtilega á óvart í tilefni dagsins og gefa honum blóm og frímiða í World Class. Ég veit nú ekki hvort ég yrði mjög ánægð með svona gjöf á konudaginn því ég myndi taka því sem ég væri orðin of feit og þyrfti nú að fara að gera eitthvað í mínum málum og þætti ekki viðeigandi að fá þessa sneið á deginum sem maðurinn á að vera góður við konuna sína og láta henni líða vel. Er það kannski bara af því að ég er kona? Hvað segiði strákar? Mynduð þið verða glaðir með að fá frímiða í World Class frá elskunni ykkar? Fékk kannski einhver svona pakka í dag?

Bóndadagur

Til hamingju með daginn elsku Mundi minn sem og aðrir góðir húsbændur. Greyið Mundi er aðeins of langt í burtu til að fá dekur í dag en á það bara inni.

Mæli með því...

...að þið kíkið á myndir frá helginni á síðunni hjá Jóni og Guðrúnu (sjá link hér til hliðar).

Framtíðarplönin í uppnámi

Fyrsti skóladagurinn á nýrri önn síðastliðinn þriðjudag settu framtíðarplön okkar Munda í mikið uppnám og engin leið er lengur að vita hvað mun taka við næsta skólaár. Málið er að það var búið að tilkynna okkur frá byrjun að það yrði niðurskurður á milli ára og að af okkur 80 sem erum á fyrsta ári í master myndu aðeins 45 komast áfram á annað ár. Þetta setti auðvitað á mann pressu en ég taldi mig nú eiga góða möguleika á að komast áfram þar sem ég hlyti að geta náð því að verða ein af 45 hæstu. En á þriðjudaginn var tilkynnt að sennilega kæmust ekki nema um 25 áfram og ljóst er að það verður mun erfiðara að vera á meðal 25 efstu. En það er sennilega ekkert við þessu að gera annað en að spýta í lófana og vera duglegur að læra og kannski fara að þróa eitthvað varaplan fyrir næsta vetur. Annars fékk ég eina einkunn á þriðjudaginn og get ekki annað en verið sátt við hana og er sennilega meðal 25 efstu í því fagi. Á hins vegar enn eftir að fá einkunnir fyrir hin 6 fögin sem ég tók á síðustu önn og tel næsta ómögulegt að ég fái eins góðar einkunnir í öllum þeim fögum. En þetta verður víst bara að fá að koma í ljós. Það eina sem ég get gert núna er að stefna á að vera há þessa önn. Ætla því að fara að læra núna.

Helgin og afmælisdagurinn

Helgin var hreint út sagt frábær. Jón og Guðrún komu hingað á föstudagskvöldið og það var spilað og drukkið rauðvín áður en við fórum í háttinn. Svo var skíðað á laugardaginn í glampandi sól, skroppið á veitngastað í fjallinu í hádeginu og snædd kálfasteik og áð sjálfsögðu rauðvín með og svo skíðað til lokunar. Þá var halðið heim á leið og fírað upp í raclette græjunni, drukkið meira rauðvín og spilað fram á nótt. Svo var farið aftur á skíði á sunnudaginn og enn var sama sólin og sami góði hádegispásupakkinn tekinn. Og svo að sjálfsögðu spilað fram á nótt. Í morgun (það var nú reyndar farið að nálgast hádegi þegar farið var á fætur) fórum við í bæinn og borðuðum afmælis-morgun/hádegisverð á kebabstað. Þau skötuhjúin lögðu svo af stað aftur til Parísar upp úr hádegi og ég tók þá eftir því að ég var ansi þreytt eftir lítinn svefn undanfarnar 6 nætur og steinsofnaði. Hafði samt ekkert fundið fyrir því að ég væri eitthvað þreytt um helgina því það var allt of mikið skemmtilegt um að vera til að maður týmdi eitthvað að vera að eyða tíma í að sofa. Þegar ég vaknaði aftur seinnipartinn var ég hálf löt og ákvað að eyða kvöldinu bara ein í rólegheitum yfir sjónvarpinu. En þá komu Daniel og Kelit mér skemmtilega á óvart og bönkuðu upp á hjá mér með risa afmælispakka. Hann reyndist innihalda voða flott freyðivínsglös og að sjálfsögðu fylgdi freyðivínsflaska með. Svo kom Hagen heim úr skólanum og söng fyrir mig afmælissönginn. Þar sem ég átti nóg af raclette-osti í afgang frá laugardagskvöldinu bauð ég þeim að borða raclette með mér og bragða á freyðivíninu í nýju glösunum. Þau voru að fara rétt í þessu og kvöldið er sem sagt búið að vera mjög skemmtilegt.

En nú er víst best að fara að tíja sig í háttinn enda ný önn að byrja í skólanum hjá mér í fyrramálið. Þessi önn verður samt alger lúxus því ég verð í fríi mánudaga, miðvikudaga og föstudaga. Þessi mikli frítími á að nýtast í að skrifa stóra rannsóknarritgerð sem á að skila í vor en ef vel verður haldið á spöðunum ætti vonandi að vera hægt að nota einhverja af þessum frídögum í fjöllunum.

p.s. Takk fyrir allar afmæliskveðjurnar sem ég er búin að fá í dag. Hef bæði fengið fullt af símtölum, kveðjum hérna á heimsíðuna, í gegnum msn og með tölvupósti. Maður getur stundum orðið pínu einmana svona í útlöndum og það hlýjar manni mikið um hjartarætur að fá allar þessar kveðjur og vita að fólk man eftir manni og hugsar til manns. Takk takk.

Törnin búin

Já síðustu tveir sólarhringar eru búinir að vera mikil kvöl og pína en nú tekur skemmtun, hamingja og gleði öll völd. Mér tókst að klára seinna verkefnið rétt fyrir hádegi í gær með því að vinna í því næstum alla nóttina. Þegar ég var búin að skila tók svo próflestur við fyrir prófið sem ég var í í morgun. Mér fannst mér bara hafa gengið nokkuð vel þangað til ég fór að tala við krakkana eftir prófið og komst að því að ég hafði gert villu, hafði gert rétt fyrst en breytti því svo og er því ansi svekkt yfir því. En það þýðir víst ekki mikið að vera að svekkja sig yfir því núna, enda ekki hægt að breyta því sem orðið er. Vona bara að ég nái prófinu svo að ég þurfi ekki að fara í endurtektarpróf í júní þar sem planið er að eyða byrjun júní í ferðalag en ekki prófalestur.

En nú er þetta sem sagt allt búið og ég komin með skíðapassa fyrir helgina í hendurnar. Var rétt í þessu að tékka á spánni og hún hefur ekkert breyst: glampandi sól alla helgina. Það á því ekkert að geta komið í veg fyrir að helgin verði með besta móti. Veit að Mundi er ansi svekktur að missa af fjörinu hér og hans verður sárt saknað (ég sakna hans nú reyndar á hverjum degi en gladdist fyrir hans hönd að þurfa ekki að vera hérna með mér þegar ég var í þvílíku stresskasti út af þessu blessaða verkefni og var að fríka út. Hann hringdi í mig á miðvikudagskvöldið og það var varla hægt að eiga við mig samræður því ég var gjörsamlega úti á þekju, þreytt og stressuð.) En Mundi þarf ekki að örvænta því það er morgunljóst að það verða fleiri svona helgar, já eða jafnvel vikur, í vetur og hafa ýmsir nú þegar boðað komu sína til að taka þátt í því.

Ég er að morkna

Verð bara að taka mér smá bloggpásu. Er ekki að ganga nógu hratt hjá mér með þetta helv... verkefni og stefnir í að ég þurfi að vera að langt fram á nótt. Er enganvegin að nenna því. En ég hlýt nú að hafa þetta af. Get glatt mig með hugsununni um að eftir minna en tvo sólarhringa verður líf mitt tóm hamingja, þ.e.a.s. ef mér á ekki eftir að ganga allt of illa í þessu prófi. Já já, til að það gerist ekki er víst best að fara að hætta þessu bulli og halda áfram, þetta er að verða búið...

Þetta er allt að koma

Þá er ég búin að klára eitt verkefni og eins gott ég verði dugleg í dag því er bara hálfnuð með hitt verkefnið og það á að skila í fyrramálið. Líka eins gott að ljúka þessu af til að geta byrjað að læra fyrir prófið sem er á föstudagsmorguninn.

Mikið verð ég ánægð á hádegi á föstudag þegar þessu verður lokið og ég fer í sundlaugina og kaupi mér ódýra skíðapassa fyrir helgina. Já það verður sko skíðað báða dagana og ég var að kíkja á veðurspána og veðrið á að vera frábært: glapandi sól og alles. Jón og Guðrún koma á föstudagskvöldið og verða fram á mánudag og í gær var farið í búðina og ísskápurinn fylltur af góðum mat og bjór og nóg af víni í vínhilluna og gott ef maður laumar ekki á swiss-miss og stroh til að ylja sér við skíðaiðkunina. Hvað er betra en góður félagsskapur, gott veður, skíði, góður matur og vín? Svo er ég meira að segja með nýtt spil, Sequence, sem Mundi fékk í möndlugjöf og við höfum aldrei spilað en höfum heyrt að sé mjög skemmtilegt. Ég sé því fyrir mér algjöra snilldarhelgi: snemma á fætur á morgnanna, skíðað í góðu veðri, farið heim seinnipartinn, borðaður góður matur og vín með og svo spilað þangað til farið verður í háttinn og sama plan endurtekið næsta dag.

Svo er ekki verra að ég verð ekki alveg ein á afmælisdaginn minn og aldrei að vita nema reglan um ekkert nema ávexti fyrir hádegi verði brotin og haldið upp á afmælið með kaffi og croissant, eða jafnvel eggi og beikoni á mánudagsmorguninn áður en gestirnir bruna aftur af stað til Parísar.

Queen á japönsku

Er rétt í þessu að hlusta á Gest Einar á Rás 2 og hann er að spila Quenn-syrpu á japönsku. Vona að einhver þarna úti sé að hlusta líka því þetta er með því fyndnara sem ég hef heyrt.

Misheppnuð bókasafns- og verslunarferð

Í dag fór ég á bókasafnið til að fá lánaða bók sem ég tel að geti nýst mér við að vinna annað þessara verkefna sem ég á að skila núna á fimmtudaginn en því miður var hún ekki inni og þetta því tilgangslaus ferð á bókasafnið. Þvínæst fór ég í stórmarkaðinn til að kaupa prenthylki í prentarann til að geta prentað þessi verkefni mín út en þá voru prenthylkin sem mig vantaði ekki til. Þarna fór því hálfur annar klukkutími fyrir lítið og ég verð víst að skreppa í aðra búð á morgun og reyna að fá prenthylki. Frekar fúlt.

En dagurinn var þó ekki alslæmur. Mér er búið að ganga ágætlega að læra í dag og svo fékk ég fyrirspurn frá París varðandi hvort það væri möguleiki á að fá kannski gistingu hjá mér um helgina og draga mig með á skíði. Ég hoppaði og söng af gleði, er búið að langa svo mikið á skíði í góða veðrinu hérna og var búin að ákveða að skella mér um helgina en var að hafa áhyggjur af því að hafa engan til að fara með nema kannski Þjóðverjana hérna en þau eru öll byrjendur og ég var ekki alveg að nenna að fara að eyða skíðadeginum í barnabrekkunum. Ég má samt víst ekki fara að hlakka til alveg strax því málið er enn í skoðun í París og ekki búið að taka neina ákvörðun enn. En mikið yrði ég ánægð að fá Jón og Guðrúnu í heimsókn.

ég er á lífi

gleðilegt ár allir.

það er nú orðið nokkuð um liðið síðan maður lét í sér heyra hér. jólin voru ágæt en stutt og allir hafa haft það gott mér vitanlega. í dag skrapp ég með torfa einn krísuvíkurhring þar sem voru teknar myndir og svo pylsa í þorlákshöfn. fallegt veður og fínn dagur. áðan skiptum við svo um bremsur fyrir tengdaföðurinn tilvonandi á bíl tengdamóðurinnar tilvonandi. gerðum það bara eldsnöggt.

svo er síðasta vinnuvika mín að hefjast eftir nokkrar klukkustundir því stefnan er norður í land á næsta sunnudag. þar verður tekin vika áður en farið verður til danaveldis í 5 daga. að því loknu fer maður "heim" til frakklands á ný.

Fríið búið

Ég kom heim til mín klukkan 18:30 í gærkvöldi eða nákvæmlega 12 tímum eftir að ég lagði af stað út á flugvöll. Mikið er nú leiðinlegt að ferðast einn. Ég var ansi þreytt þegar ég kom heim, fékk mér harðfisk og skyr í kvöldmat og fór svo bara eldsnemma í háttinn og vaknaði ekki aftur fyrr en 12 tímum seinna núna í morgun. Þegar ég leit út um gluggann sá ég að það er fullkomið skíðaveður; heiðskírt og 10 stiga hiti. En það verður víst enginn tími til að fara á skíði þessa vikuna þar sem nú er prófa- og verkefnaskilavika. Ég dreif mig í búðina að kaupa í matinn enda ísskápurinn galtómur. Ákvað í síðasta saumaklúbb að byrja nýjan lífstíl þegar ég kæmi aftur út þar sem allar stelpurnar virtust vera að byrja í megrun eftir ofát undanfarna daga. Nú er sem sagt planið að borða bara ávexti fram til hádegis og á milli mála, keypti hálfa kerru af ávöxtum og grænmeti í búðinni áðan svo nú er bara eins gott að ég borði þetta og láti þetta ekki skemmast eins og svo oft vill verða þegar ég kaupi ávexti. Svo var ein í saumaklúbbnum að mæla svo mikið með Spirulinu, sem eru einhverjar þörungapillur, svo að ég dreif mig í apótekið og keypti einhvern risadunk af þessu. Þá er bara að fylgja prógramminu og sjá hvort maður verði ekki orðin ný manneskja eftir svona mánuð; full af orku og kannski aðeins grennri.