...svo sagði hann ekki meira þann daginn

já - í dag fór Svanhildur og greiddi vaskinn. einhverjir verða kannski hissa á því en þeir sem hafa heimsótt okkur verða það sennilega ekki. vaskurinn í vistarverum okkar hefur nefnilega verið ömurlegur. svo lítill að það er ekki hægt að þvo á sér nema aðra hendina í einu - og diskanarnir, upp á rönd og svo snúið í hring.

um daginn fundum við hins vegar vask, sem kostaði um 1500 ISK með vask - fengum leyfi hjá gonna fyrir breytingunum svo að í dag fór ég í þröngu gallabuxurnar (já ég er alvöru og er með "píparann" í svona framkvæmdum), náði í rörtöngina og VOILÁ - nú er allt í einu hægt að vaska upp og jafnvel þvo á sér lúkurnar í leiðinni. skipti líka um borðplötuna og eldhúshilluna. þannig að nú er hillan ekki U-laga, nú er í alvöru hægt að setja hluti annarsstaðar en bara í hana miðja! gott ef ég nappaði ekki líka nýjum blöndunartækjum úr lager xaviers og skellti á herlegheitin.

næsta framkvæmd verður þegar ég byggi bílskúrinn hérna - ég á bara enn eftir að ákveða hvort hann verður á svölum nágrannans eða bara á miðri götunni, byggingarleyfið er klárt - fékk það fyrir lítið hjá honum Bessa ....

já svona fer fransmaðurinn með bílinn manns þegar hann vantar að hlusta á útvarpið. hurðin bara beygð upp eins og lok á niðursuðudós. ég sem hélt nú að sænska freðmýrastálið væri aðeins seigara en þetta!

það þarf líklega að bíta í þetta eins og önnur súr epli -en ég er enn afskaplega pirraður þó svo að ég viti að þetta sé nú kannski ekki stærsta vandamál sem getur komið upp. en þetta verður til þess að manni á ekki í bráð efir að finnast maður öruggur með sitt og það er í meira lagi óþægileg tilfinning.

morgunljóst er hins vegar að frakkar unnu sér ekki inn mörg rokkstig hjá mér þessa helgina.

Eftir að hafa eytt tveimur og hálfum tíma á lögreglustöðinni við skýrslugerð og bið (aðallega bið) á laugardagskvöldið, fórum við heim og ákváðum að hætta að hugsa um bílinn í bili og fengum okkur í glas með Þjóðverjunum. Kvöldið var fínt og ekki laust við smá þynnku í gær með tilheyrandi videoglápi og hamborgaraáti.

Í dag er það svo spjall við tryggingarnar til að reyna að fá þá til að borga manni eitthvað til baka af því sem maður borgar þeim samviskusamlega á hverju ári.

En nú er ég farin í skólann.

Mikið óskaplega varð ég glaður áðan þegar ég ætlaði að fara á bílnum mínum og sá að það var búið að brjótast inn í hann og losa mig við útvarpið, gömlu myndavélina mína úr hanskahólfinu og beygla hurðina hressilega.

Djöfull er ég reiður núna

Er það bara ég - eða er ekki eitthvað bogið við þetta? Allavega ekki fengið mér kebab þarna enn sem komið er. :-)

Já það er ekki seinna vænna að fara að skipuleggja jólafríið svona þegar skólinn er nýbyrjaður eftir sumarfrí. Alla vega svona þegar maður býr í útlöndum og þarf að vera viss um að fá flug heim þegar manni hentar. Ég var að vonast til að vera ekkert í skólanum á föstudögum til að geta flogið heim seinasta kennsludag fyrir jólafrí sem er föstudagurinn 17. desember. Eins og gera mátti ráð fyrir rættist ekki úr þeirri ósk minni og ég þarf sennilega að taka tvö próf þennan dag. Ég var því að enda við að breyta flugmiðanum mínum heim og kem ekki fyrr en mánudaginn 20. desember. Svolítið fúlt að ná ekki þessari helgi heima en þetta þarf þó ekki að vera alslæmt. Málið er nefnilega að samkvæmt planinu eiga prófin að vera í byrjun janúar en það virðist sem margir kennarar velji frekar að hafa þau í seinustu kennslustund fyrir jólafrí. Nú þarf ég bara að komast að því hvort allir kennararnir mínir hugsi sér að hafa þetta þannig. Ef svo er þá gæti það þýtt að í stað þess að þurfa að eyða fríinu í að læra fyrir próf og þurfa að fara út aftur 2. janúar, þá mun ég kannski bara vera búin í prófum fyrir jól og þarf ekki að mæta aftur í skólann fyrr en um miðjan janúar. Þetta er samt enn allt óljóst en sakar ekki að láta sig dreyma um langt jólafrí í faðmi fjölskyldu og vina.

eitthvað held ég nú að elskuleg systir sé að gera grín í mér núna! skellihlær og skellir sér á lær. :) einkennismynd þessarar síðu er orðin einkennileg. og ég sem nota bara tölvur en kann ekki á þær! ég ákvað því að setja hér inn fyrstu myndina frá Grímseyjarferð okkar í sumar í þeirri von að það dragi athyglina frá hinni hægra megin við. afgangurinn af Grímseyjarmyndunum er á leiðinni - en bíðum samt aðeins.

annars logn og 24°C

ef þið hafið eitthvað að segja - endilega kommentið þá. sjálfur man ég ekki eftir neinu í augnablikinu :-)

dæmalaust!

já hvað er hann með margar lappir þessi!!!

hahahaha... ég var að hlusta á hádegisfréttirnar á Rúv. mér finnst þetta mögnuð lágkúra sem er í gangi hjá okkar heittelskaða fyrirtæki Flugleiðum. já það eru margar ástæður fyrir því að fljúga ekki með þeim. - hér er til dæmis ein: skoðið þetta og á hvaða vefslóð það er.

svo kærðu þessir álfar broskallinn!!! :)

í dag sóttum við um þjónustu hjá nýrri netveitu. við ætlum semsagt að færa okkur frá ríkisbatteríinu, france telecom, til einkaaðila. við höfum verið mjög sátt við þá þjónustu sem við höfum fengið - en nú er svo komið að aðrir eru einfaldlega að bjóða miklu betri verð, og bundinn árssamningur okkar við hina er að renna út. nú fáum við helmingi hraðari tengingu á hálfvirði þeirrar sem við erum með, (512=>1024) auk þess að þurfa ekki að binda okkur allt árið. þannig að netfangið mitt mundi74@wanadoo.fr fer að detta út einhverntíman á næstunni. því mælist ég til að þeir sem eru með mig inni á adressbook hjá sér fari að senda mér póstinn frekar á mundi74@hotmail.com og eyði hinu netfanginu. ég mun láta vita hér þegar þetta endanlega tekur gildi.

ekki veit ég hversu hratt og vel þessar breytingar ganga í gegn - frakkinn til alls líklegur þegar að því kemur að klúðra hlutunum en sjáum til.

rólegur dagur að baki og afrakstur ekki mikill. þó náði ég að kaupa egg og brauð og setti upp hillu fyrir skíðaskóna okkar og vifturnar sem við þurfum vonandi ekki að nota fyrr en að nokkum mánuðum liðnum. plássið ekkert að plaga okkur hérna á 15 fermetrunum! en, já hér hefur aðeins kólnað síðustu 3 vikur - þó eru hér 18°C og logn, þegar þetta er skrifað rétt fyrir kl. ellefu um kvöld.

í dag datt inn næstsíðasti myndapakkinn frá íslandi. það eru örfáar myndir frá þeirri helgi þegar ég gerði það sem mér finnst allra, allra skemmtilegast og skellti mér norður í mývatnssveit í gæsir.

síðasti myndapakkinn frá íslandi er svo með myndum frá Grímsey. hann gæti nú farið að detta inn innan tíðar.

er maður búinn að vera að aka of mikið í umferðinni í frakklandi!?!? kíkið á þetta.

í dag er hjá okkur góður gestur. þau gonordhjónin eru hérna í grenoble í nokkra daga því gonni þurfti að fara á spítala. þau voru að eignast þennan smávaxna snilling sem ég kýs að kalla Kött. hann dvelur því hérna hjá okkur á 7 rue ernest calvat næstu daga, áður en hann flytur til nýrra heimkynna sinna í fjöllunum og gerist fjallaljón.

já það voru fleiri með stafrænar myndavélar á siglufirði, um verslunarmannahelgina, en við. bæði Björn og Torfi eiga slíkar gersemar og besta skot helgarinnar er líklega í eigu Torfa.

ykkar einlæg

Þá fer fólkið smám saman að tínast hingað til grenoble. sem er gott. hér er búið að vera tómt hús síðan við komum en nú eru komnir hingað nokkrir nemar, frá bretlandi, þýskalandi og moldavíu.

þar sem ég stóð,með sandpappír í annarri og hina í vasa áðan, þá fór ég að hugleiða hver væri svona megin munurinn á milli hinna ýmsu þjóða og þjóðerna. vissulega er hann stór, landfræðilega, pólitískt osfrv, en hugsanagangur er líka mjög mismunandi, það sem þykir tilhlýðilegt á einum stað fellur ekki í kramið á öðrum og svo framvegis. þannig að mér datt sísvona í hug að setja saman einhverja frasa sem lýstu meðalmanni hverrar þjóðar sem ég hef kynnst á þessu flandri mínu um útlönd. ákvað að hafa þetta svona:

Þjóðverjinn gerir það - á réttum tíma, af því að það er gott fyrir umhverfið

Frakkinn gerir það - eins og honum hentar, þegar honum hentar

Bretinn gerir það - öfugu megin við alla hina

Daninn gerir það - þegar sólin skín og ölið er kalt

Kaninn gerir það - af föðurlandsást

Svíinn gerir það - best að eigin sögn

Ítalinn gerir það - ekki ! en talar um að fara að gera það, ...eftir matinn

Kanadamaðurinn gerir það - í rólegheitum

Spánverjinn gerir það - ha, humm já á morgun bara er það ekki??

Arabbinn gerir það - ef mamma og konan eru veikar og geta það ekki

....og Íslendingurinn gerir það að sjálfsögðu í vinnutímanum !

það skal tekið fram að þessi texti felur ekki í sér staðreyndir, heldur skoðanir mínar eða tilfinningar fyrir þessum hlutum og auðvitað falla aldrei allir undir sömu skilgreininguna. allur réttur áskilinn. :-)

Já - nú eru komnar inn í albúmið myndir frá verslunarmannahelginni sem leið. þar voru margir góðir saman komnir, grilluðu og gerðu grín.

´

annars er það nú markverðast héðan að frétta að ég keypti mér strigaskó áðan, já eins og þið heyrið allt að gerast hér í grenoblehreppi. það passaði að svo fór að rigna, fyrsti rigningardagurinn okkar síðan við komum er semsagt orðinn að veruleika. ...og já já... sei sei já

Frá því við komum til Grenoble hefur Mundi haft í nógu að snúast við að mála og læra en ég hef hins vegar haft frekar tómlega stundatöflu og hef því nýtt tímann í lestur, og nei ég er ekki búinn að snerta á skólabókunum heldur hef ég eingöngu verið að lesa mér til gamans (og ef til vill líka til gagns). Ég var núna áðan að enda við enda við Da Vinci lykilinn sem þið hafið örugglega mörg lesið og þið sem hafið ekki gert það enn skuluð drífa í því (eða alla vega gera það í jólafríinu). Þetta er snilldar spennusaga sem velltir upp óteljandi áhugaverðum spurningum. Núna langar mig bara að fara að finna mér bækur um sögu Kirkjunnar með stóru Kái. En ég ætla nú annars ekki að segja mikið um innihald bókarinnar, vildi bara endilega mæla með henni við ykkur öll. Held þetta sé bók sem nær gjörsamlega til allra, skiptir engu máli hvort maður er karl, kona, strákur eða stelpa.

það er ákaflega tíðindalítið af suð-austur vígstöðvunum þessa dagana. ég dunda mér við að mála fyrir gonna fyrripart dags og svo reyni ég að nærast og kíkja í bækur þess á milli. en andinn ætlar ekki að koma yfir mig þessa dagana, ég er eitthvað hálf andlaus þegar ég ætla að skrifa eitthvað hérna inn, svo ég læt þetta duga að sinni

Ég var á fundi í morgun uppi í skóla þar sem var verið að útskýra nákvæmlega í hverju námið mitt mun felast og ég er bara rosa spennt að byrja eftir þennan fund. Þetta eru allt svo spennandi kúrsar. Það var líka gaman að hitta krakka sem ég var með í nokkrum kúrsum í fyrra en þetta verður töluvert öðruvísi hjá mér núna þar sem ég verð ekki að taka kúrsa með mismunandi hópum heldur alltaf með sömu krökkunum svo maður nær kannski að eignast einhverja vini í skólanum núna.

Námið er skipulagt þannig að fyrstu önnina eru kenndar 15 einingar (30 ECTS) en á næstu önn verð ég bara í 7,5 einingum og þarf svo að skrifa 50 blaðsíðna ritgerð sem gildir 7,5 einingar. Þriðja önnin er svo aftur 15 einingar í skólanum en síðasta önnin er fjögurra mánaða verknám erlendis og svo lokaritgerð. Ég á því í rauninni bara eftir eitt og hálft ár hér í Frakklandi og svo bara spurning hvar maður tekur verknámið. Það er aldrei að vita nema maður skelli sér bara í það heima á Íslandi. Engar ákvarðanir hafa þó verið teknar enn enda nægur tími til stefnu til að ákveða hvort maður eltir heimþrána sem blundar alltaf í manni eða útþrána sem hefur alltaf verið mjög sterk í mér en fer þó minnkandi. Kannski hún verði horfin eftir eitt og hálft ár. Það er jú engin tilviljun að einhver fann upp á orðatiltækinu Heima er best.

já - enn eru komnar inn myndir í albúmið frá íslandsferðinni. og ekki þær síðustu. í þetta skiptið er það risastór myndapakki frá helginni eftir verslunarmannahelgi þá eyddum við föstudagskvöldinu við stöng í þjórsárdal með Torfa og Evu. á laugardag komu svo Snæbjörn, Ella og Gauti og ferðinni var haldið áfram inn í landmannalaugar og á sunnudeginum var svo gengið inn að háafossi með þeim. þetta var án nokkurs efa ein besta helgi sumarsins, enda veðrið með eindæmum gott og sló í eða nærri þrjátíu gráðum á laugardeginum.

þarna er mikið af landslagsmyndum en undirritaður reynist hafa teflonheila þegar að því er komið að muna örnefni. því hvet ég þá sem geta fyllt í eyðurnar til að nota kommentin til að tjá sig, mér og öðrum til fróðleiks og glöggvunar.

- annars tíðindalítið, logn og 29 stig.

það er búinn að vera annasamur dagur hérna. ég er búinn að vera að reyna að læra með öðru. mikið ofsalega finnst mér þetta fara eitthvað hægt af stað hjá mér, þeas mér þykir framleiðnin ekki mikil, það er ekki mikill afrakstur af hverjum klukkutíma. ég er að reyna að telja mér trú um að þetta séu svona byrjunarvandamál.

annars kom hann xavier, betur þekktur hér á síðunni sem gonni leigusali, til okkar í dag. við skulduðum honum leigu fyrir ágúst og september sem við greiddum. skömmu síðar endurgreiddi hann okkur ágúst, sagði að við hefðum ekki verið hérna svo svona ætti þetta að vera. við kunnum honum þakkir fyrir það. svo var hann að biðja mig um að vinna fyrir sig. nú vill hann helst láta mála öll herbergin hérna á 7 rue ernest calvat. og sum sem allra fyrst. þegar ég klára það á hann svo verkefni í fjöllunum ef ég vil. þetta er náttúrulega alveg stórfínt og við skeggræddum þessi mál hérna yfir bolla af kaffi. ég lofaði honum að gera eins og ég gæti.

svo réð hann mig formlega sem húsvörð hérna yfir herlegheitunum í dag. sá starfi felst í því að ef að eitthvað kemur uppá hérna, fer að leka vatn eða eitthvað þá á ég að redda því, og vera tengiliður við hann ef þess þarf með. hann ætlar að fara að hækka húsaleiguna hérna hjá öllum en mín greiðsla felst í því að við munum áfram greiða sama verð.

já þannig að það er búið að vera í mörgu að snúast hér í dag og það fól í sér að það verður mikið að gera næstu daga og morgunhugleiðing um útilegu er í uppnámi ...já fussumsvei

hér er aðeins svalara nú í morgunsárið en undanfarna morgna, og er það bara vel. minn nýji mælir sýnir mér 22 gráður. annars ætla ég að reyna að vera duglegur við lærdóminn í dag og á morgun, gerði skurk í gær og fyrradag, en betur má ef duga skal. ég missti síðustu viku úr, og mig langar að eiga frí um helgina og fara eitthvað með tjaldið. miðjarðarhaf, ítalía eða sviss - nú eða bara fara eitthvað styttra, kannski upp í fjöllin.

ég tek mér nú kannski pásu í dag og set inn fleiri myndir, - lofa engu en hver veit.

...fyrir svolitlu síðan var mér gefið símakort. ég ákvað að nota það frekar en mitt gamla kort. það gleymdist hins vegar að breyta númerinu hérna á spássíunni en nú ætti það að vera komið í lag og allar upplýsingar réttar

já fyrsti myndapakkinn frá íslandsferð okkar er loksins kominn inn á myndasíðuna okkar. þetta eru myndir frá fyrstu helginni á íslandi, en þá fór ég með myndavélina norður í land að heimsækja vini mína. ekið var suður yfir sprengisand að næturlagi og tíminn nýttur vel. þetta var svona "stórustrákarnirleikasérhelgi!!!"

endilega kíkið á og skoðið, og munið að þar er líka hægt að kommenta, hafi þið eitthvað gáfulegt að segja.

annars allt með kyrrum kjörum á suðurvígstöðvunum - 31 stig og logn.

(mes amis francophones - les nouvelles photos sont dans l'album - il y en aura plus plus tard)

komin til grenoble, ...og núna tekið upp úr töskum.

dagurinn í dag er búinn að vera erfiður en uppskeran varð góð svo það var nú í lagi. við fórum til þess að standa í röð fyrir utan bercy höllina upp úr hádegi í dag. þar var fyrir talsverður fjöldi fólks, sumir höfðu greinilega gist þar nóttina fyrir tónleika til að ná góðu plássi. við komumst frekar framarlega í röðina. þar með er nú ekki nema hálf sagan sögð því það var alveg hrikalega heitt hérna í dag og við vorum í raun ekki nógu vel undir það búin að bíða þarna allan daginn í sólinni. hefðum haft með okkur meira að drekka og sólhlíf eða hatta eða eitthvað slíkt, hefðum við vitað hvað það var sem beið okkar. þetta bjargaðist nú samt allt því öryggisgæslukarlarnir komu allt í einu með fullt af vatni að gefa þeim sem biðu því það var farið að líða yfir einhverja af hitanum. þannig leið svo dagurinn í svitakófi og troðnigi, satt best að segja ekki mjög spennandi. nettur sólbruni á sumum.

okkur var svo hleypt inn klukkan hálf sjö. við náðum stæði á frábærum stað, svona 10 metrum frá sviðinu. þar biðum við svo til klukkan níu en þá steig Madonnan á sviðið og hélt gríðarlega sýningu fyrir okkur og hina 25 þúsund sem þarna voru. þetta var algerlega ótrúleg "sýning" sem stúlkan sú var með þarna, ég hef ekki séð annað eins, það komu svið niður úr loftinu sem gengu út í salinn og hún notaði mikið myndbönd í bakgrunn, þar voru tjöld á brautum sem fóru út um allt osfrv. eiginlega ómögulegt að lýsa þessu, en snilld var það. og stemmingin í salnum var alveg ótrúleg, þetta var semsagt erfiðisins virði þegar öllu var á botninn hvolft, eitthvað sem ég var nú farinn að efast um á sundi í skyrtunni minni fyrr um daginn. reyndar var svitinn lítið minni inni í höllinni þegar líða fór á konsertinn, þvílíkt og annað eins....

þannig var dagurinn hér, nú er svo bara að koma sér í háttinn, því það er ferðalag til Grenoble á morgun, við eigum lest þangað um kl 14 og verðum því væntanlega á rue ernest calvat um kvöldmatarleitið.

já fínn dagur að baki hérna hjá okkur. búin að labba heilmikið um bæinn í dag, búin að kaupa á mig gallabuxur og finna hótel handa tengdó meðal annars.

á morgun erum við svo að spá í að skoða katakomburnar og eitthvað fleira, og jafnvel að kíkja út á lífið hérna í parís annaðkvöld ef veður leyfir...

já þá erum við nývöknuð og eldhress hérna í parís hjá Jóni og Guðrúnu. ferðalagið í gær gekk vel og við vorum komin hingað um kl 4. hér er besta veður, sól og blíða.

við erum semsagt að byrja að blogga hérna á ný eftir ágætt sumarfrí, þannig að endilega kíkið hérna inn og kommentið, þá vitum við af ykkur. - myndiarnar sem ég var búinn að lofa eru ekki klárar á netið enn, ég á eftir að velja úr myndir til að minnka og setja inn en það gerist núna alveg fljótlega vonandi.

annars viljum við þakka fjölskyldum, vinum og vinnufélögum góðar samverustundir og alla greiðana á meðan íslandsdvöl okkar stóð, það er ykkur að þakka að það var svona gaman.. húrrra fyrir ykkur.