Elín Margrét er búin að gera víðreist á sínu fyrsta ári. Að Danmerkurferð lokinni er hún búin að fara Strandir alveg norður í Ófeigsfjörð, og Steinadalsheiði til baka, búin að fara á ættarmót í Eyjafirði, fara bæði Kjöl og Sprengisand, um Mælifellsdal ofan í Skagafjörð, Lágheiði til Ólafsfjarðar, fara í fiskisúpu á Dalvík, og skoða hvali á Húsavík. Brölta um Þeistareyki og Gjástykki, skoða Aldeyjarfoss, Hrafnabjargarfossa og Fagrafoss og fleira og fleira. Við vorum svo heppin að fá að fara með henni um þessar slóðir. Í fyrramálið held ég svo til fjalla á ný með frakkana í síðustu ferð þessa sumars, ætla að vera í tjaldi í svona 2 vikur í viðbót, en þær mæðgur verða eftir þetta sinnið enda menningarnótt og ýmislegt fleira framundan...

Myndin hér að ofan er tekin einn góðviðrisdaginn með skálann á Þeistareykjum í baksýn.

Við vorum í Danmörku á dögunum. Þangað gerðum við fína ferð, náðum að gera margt okkur til skemmtunar, fórum í Ljónagarðinn, Legoland og svo í nýja vatnsleikjagarðinn í Billund sem heitir Lalandia. Þetta var allt snilld, sem og hjólhýsaferðalag til Silkeborgar og sigling þar um vatnið.

Þegar við vorum ekki að skemmta okkur eða borða góðan mat í foreldrahúsum eða á veitingastöðum, þá málaði ég húsið hjá þeim utan og stelpurnar nutu lífsins í garðinum þegar viðraði. Eins og sjá má á annarri af meðfylgjandi myndum fannst Elínu Margréti alveg stórfínt að sóla sig. Hin myndin er af því þegar hún var böðuð í plastkassa í fortjaldi hjólhýsisins um Hvítasunnuna. Alveg stórfín ferð sem við áttum og nú búa foreldrar mínir í "hvíta húsinu"

Í dag kláraði ég svo minn síðasta dag í bili í Hagaskóla, ég mæti aftur til vinnu þar í haust en fram að því ætla ég að teyma franska ferðamenn um byggðir landsins, þó meira um óbyggðir.

Hér kemur ein sem var tekin eftir að við feðginin skelltum okkur í kröfugöngu á 1.maí.

Hér kemur ein vikugömul mynd af nýjasta sundkappanum...

Elín Margrét er langsætust í nýja dressinu frá Maggý frænku.

Í dag fór Elín Margrét í sína fyrstu bakpokaferð. Í henni var hún farþegi í þar til gerðum bakpoka! Eftir dálitla göngu á Þingvöllum (afar þjóðlegt að byrja ferilinn þar) fór hún svo til ömmu og afa í Lækjarhjalla þar sem þessi mynd var tekin.

Á morgun ætlum við svo að reyna að skoða eldgosið, þá fær hún að fara með inn í Þórsmörk, en verður að láta sér það nægja þetta skiptið. Annað hvort mun Ella amma eða ég gæta hennar þar meðan aðrir ættingjar og vinir ætla að reyna að sjá herlegheitin í návígi

Elín Margrét var í banastuði áðan...

....enda alveg að koma helgi!

Ég var kannski heldur bjartsýn að ætla í útilegu næstu helgi en það var bara svo mikið vor í lofti í febrúar en svo kom allt í einu veturinn í mars. En nú er hins vegar aftur farið að hlýna og væri svo sem alveg hægt að fara í útilegu næstu helgi ef ekki væri fyrir rigninguna sem spáð er og það er einnig mikil bleyta í jörðinni. Svo að útilegunni verður frestað um óákveðinn tíma eða þangað til við fáum góða helgarspá, þá skellum við okkur bara í'ann.

En við förum þá á Vífilsfell næsta sunnudag (14. mars) og ég held það sé bara ágætt að hittast á bílaplaninu við Olís við Rauðvatn kl. 11:50 og keyra samferða þaðan.

Ef við fáum ekki útileguveður helgina 20.-21. mars þá förum við á Stóra Meitil og Litla Meitil í Þrengslunum þann 28. mars og náum þannig tveimur tindum þann daginn. Það er alveg 3ja-4ja tíma ganga en þeir sem vilja geta bara látið Stóra Meitil nægja

Næsta sunnudag munum við ganga á Grímannsfell í Mosfellsdal. Ég hafði hugsað mér að byrja gönguna við Gljúfrastein og byrja á að labba upp með Köldukvísl eins og sagt er frá hér
Ef hins vegar veðrið er leiðnlegt þá munum við bara fara stystu leið upp eins og lýst er í bókinni Íslensk fjöll - gönguleiðir á 151 tind (sjá bls. 74) en þá er ekki ekið alveg að Gljúfrasteini heldur beygt til hægri nálægt Hraðastöðum og ekinn ca kílómeter inn þann veg í átt að fjallinu. Ég legg því til að við hittumst bara kl. 12:00 á bílastæðinu undir Helgafelli og ákveðum hvora leiðina við veljum.