markaðsfræði 101 - ímynd
Í markaðsfræði höfum við svolítið verið að fjalla um ímynd. Ég hef mikinn áhuga á þessu viðfangsefni aðallega eftir að ég var að vinna hjá mixa (nú pipar) þar sem við unnum mikið með fyrirtækjaímynd (Corporate Identity) en ímynd er hægt að heimfæra á alla hluti, bæði einstaklinga, samtök, vörur sem og heilu löndin.
Í markaðsfræðitímanum hef ég alltaf verið með Ísland sem útgangspunkt í hausnum á mér, líklega af því þetta er svo mikið í umræðunni þessa dagana heima (allavega eftir því sem ég tek eftir); Vörumerkið Ísland, Framtíðarlandið (sem fjallar um hvernig viljum við vera og hvað getum við gert til að láta það verða að veruleika), Viðskiptaþing 2007 og svo mætti áfram telja.
Mig langar aðeins til að rifja upp þessi grundvallarhugtök sem við vorum að skoða í markaðsfræðitíma fyrir nokkru og hvað er betra en bloggið sitt þegar maður er að rifja upp glósurnar sínar og fá kannski einhvern til að leiðrétta sig ef maður fer með fleypur.
Ísland er líka ágætis útgangspunktur.
- -
Á ensku er það tvennt sem snýr að því sem við köllum ímynd, annarsvegar 'image' og hins vegar 'identity'. Íslenskar þýðingar á þessu hafa aðeins verið að velkjast fyrir mér, enska orðabókin mín - sem er reyndar aðeins komin til ára sinna - segir að Image sé: mynd (einkum í huganum), líki, ímynd, eftirmynd. Identity er hins vegar þýtt sem: einleiki, samsemd, samræmi, samsvörun, kennimark, yfirbragð. Þarna er ekkert orð sem ég kannast við að hafi verið notað í daglegu tali um ímynd. Einhvernvegin held ég að þegar talað sé um ímynd þá sé verið að hugsa um bæði það sem er image og það sem er identity (sbr áðurnefnt "Corporate Identity"). Og kannski er það þessvegna sem það er svo erfitt að byggja upp "ímynd" á Íslandi, við misskiljum orðið.
En hver er munurinn?
Image
Ímynd (image) fjallar um það hvernig aðrir sjá okkur. Það getur verið á skjön við það hvernig við viljum vera séð því öll umræða, allt sem við gerum og það sem aðrir segja um okkur hafa áhrif á ímyndina (Image), óháð því hvort það sé rétt eða rangt því það byggir á tilfinningu (emotional interpretation) einstaklingsins og orðrómi. Orðrómur getur byggst á fáfræði og getgátum og getur svo sannarlega breiðst út og valdið snjóboltaáhrifum á bæði jákvæðan og neikvæðan hátt. Við getum haft áhrif á ímyndina (image) en getum ekki stjórnað henni. Af hverju ætli fyrirtæki séu farin að blogga?
Það er því mikilvægt að reyna að hafa áhrif á ímynd (Image) með því að tala opinskátt og af heilindum, því heilindi (integrity) skipta gríðarlega miklu máli fyrir trúverðugleika og marktækni. Fólk er mjög fljótt að sjá í gegnum það ef það er verið að reyna að blekkja það.
Ef menn halda að hvalveiðar Íslendinga hafi ekki haft neikvæð áhrif á ímynd (image) landsins þá þurfa þeir alvarlega að hugsa sinn gang.
Identity
Ímynd (Identity) fjallar um það hvað við segjum að við séum. Til þess þurfum við að skilgreina fyrir okkur hvað við erum og ekki síður, hvað við erum ekki. Þegar verið er að vinna með fyrirtækjaímynd þá er verið að búa til sérstöðu á markaði fyrir vöru eða þjónustu. Öll fyrirtæki eiga að geta sýnt fram af hverju þau eru til.
Með því að hafa sterka ímynd (identity) þá ertu um leið að fræða fólk (minnka fáfræði) ig búa til betri ímynd (image) í þeirra huga sem mun veita því tækifæri til að taka sjálft meðvitaða (eða ómeðvitaða) afstöðu gagnvart þér. Lokatakmarkið er að fá það til að velja þig (vöru/þjónustu) umfram aðra.
- "Market outwards to create an image, work on the inside to create an identity"
- -
Næst ætla ég að skoða ímynd (image og identity) Íslands og athuga hvernig ég skynja hana í gegnum þá erlendu aðila sem ég þekki, ásamt því að reyna að greina hvað við viljum standa fyrir, hvernig við viljum hafa tekjur og hvað við getum gert til að breyta því sem þarf að breyta.
