Alltaf að stækka
Við viljum byrja á því að þakka öllum fyrir allar fallegu sængurgjafirnar sem stráksinn er búinn að fá, allt kemur að góðum notum og er alveg yndislegt. Takk kærlega fyrir okkur.
---
Hjúkkan frá ungbarnaverndinni kom í gær til að vigta drenginn og hann er nú ekki lengur litli keisarinn okkar heldur frekar stóri keisarinn okkar:) Hann er núna orðinn 4250gr og því búinn að þyngjast um tæpt hálft kíló á innan við viku eða 440gr. Það er því greinilegt að hann er að dafna vel hérna, enda er hann kominn með undirhöku og bollukinnarnar stækka óðum.
---
Annars þá gengur vel hérna - stóri gaurinn ætlar greinilega að vera nátthrafn eins og mamman því hann vill helst ekkert fara að sofa á kvöldin, vill bara vaka og spjalla og vælir reyndar smá, var með smá verki í mallanum í fyrradag og en það er verið að vinna í þessu með öllum ráðum, honum leið betur í gær og vonandi verður kvöldið í kvöld ljúft.
---
Stráksinn er búinn að fara í pössun í fyrsta skiptið. Gréta amma var að passa meðan nýbökuðu foreldrarnir fóru í jólagjafaleiðangur. Það var nú ekki mikið mál að passa þennan gutta, hann bara svaf eins og engill allan tímann enda er svo gott að vera hjá Grétu ömmu:).
---
Síðan er búið að plana skírn fyrir norðan milli jóla og nýárs. Þetta verður bara lítil athöfn í Stærra Árskógskirkju og síðan smá kaffiboð fyrir þá nánustu í Ásveginum. Það er búið að velja nafn og við erum búin að vera að máta það við hann hérna heima, erum að passa okkur á að missa það ekki út úr okkur þegar það eru gestir hérna og enn hafa engin slys orðið:) Annars þá fer að líða að norðurferð og þá verður nú gaman að knúsa alla og kyssa.
En þar til næst -
kveðja frá stráksa sem fær bráðlega nafn og þá er hægt að hætta að kalla hann stráksa/gutta/keisara/stubb og allt það:)

@ 15:24 -