~ Ragnar Númi Reykjalín ~

Tuesday 17. August 2010

9 mánaða gaur og tíminn alveg flýgur áfram

Jæja núna er gaurinn 9 mánaða og dafnar vel. Sumarið er búið að vera viðburðaríkt hjá okkur. Við erum búin að fara í 2 útilegur í sumar og Ragnar Númi skemmti sér konunglega. Búinn að sjá tvær flugeldasýningar sem voru ekkieins skemmtilegar því ég er pínu hræddur við hvellina. Annars þá erum við mæðgin búin að eyða bróðurparti sumarsins á norðurlandinu á Hauganesinu – vorum þar allavegana meira en við gerðum ráð fyrir í upphafi sumars.
---
Stóri strákurinn okkar er voða duglegur en varkár drengur. T.d um daginn þá var hann að hella úr dótakassanum og þá rakst hann í andlitið á honum og hann fór að gráta smá. Stuttu seinna var hann aftur að tosa í kassann og aftur fór hann í andlitið á honum með tilheyrandi gráti. Í þriðja skiptið sem hann tosaði í kassann var hann svo viðbúinn því að fá hann í andlitið að hann var kjökrandi allan tímann sem hann tosaði í kassann. Litla krúttið. Hann er samt ekkert hættur að sturta út kassanum en fer mjög varlega að því og er greinilega viðbúinn öllu.
---
Hérna koma nokkrar 9 mánaða montfréttir frá Ragnari Núma:
- Ég get klappað saman lófunum og það heyrist smellur og allt. Þetta geri ég oft og sérstaklega þegar ég er búinn að vera duglegur og mamma segir „Veeeiiiiiiiii“.
- Ég er kominn með tvær tennur niðri og nota þær óspart, stundum bít ég í puttann á mömmu eða pabba, þá koma alveg grettur og ég hristist eins og ég sé að bíta voða fast en það er bara í þykjustunni því ég bít voða varlega.
- Ég er loksins farinn að fá almennilegan mat, mér fannst þetta mauk sem mamma var að gefa mér ekkert spes en núna fæ ég bara sama mat og mamma og pabbi eru að borða og líkar það vel.
- Fínhreyfingarnar eru alveg komnar á fullt hjá mér og ég er rosa duglegur að tína upp í mig cheerios eða brauðbita með kæfu, svo er ég alltaf að nota vísifingur til að benta eða ýta á hluti.
- Ég er alltaf að æfa mig í að fara í skriðstöðu en fer mjög varlega svo ég detti ekki á andlitið, en finnst samt skemmtilegra að fá bara putta að halda í og labba um allt sjálfur. Síðan get ég líka hoppað smá áfram á rassinum ef ég þarf að komast eitthvað.
- Er farinn að æfa mig í að reisa mig upp sjálfur en það er auðveldast þegar ég nota mömmu eða pabba til að tosa mig upp.
- Ég er voða duglegur að dunda í dótinu mínu og finnst sérstaklega skemmtilegt að hreyfa til stóra hluti. Bíllinn sem Númi afi smíðaði er voða skemmtilegur þessa dagana, því það er hægt að halda í hann og labba með, ýta honum fram og til baka eða bara sitja í honum.
- Baðið er mikið í uppáhaldi hjá mér og finnst mjög gaman að busla og skvetta í vatninu.
- Fyrir norðan gerði ég fyrsta listaverkið mitt, enda finnst mjög mjög gaman að halda á penna og sjá strikin koma á blaðið.
- Mér finnst mjög gaman að vera í kringum aðra krakka og fylgist mikið með því hvað þau eru að gera. Ég er líka mjög athugull á umhverfið og finnst gaman að skreppa með mömmu í búðir, þar er svo mikið að sjá.
- Finnst mamma mín oft fyndin því hún er svo oft að gretta sig eða ærslast með mig.
- Ég á uppáhalds bangsa og vill helst ekki fara að sofa nema vera með bangsann minn hjá mér því það er svo gott að knúsa hann.
- Ég er voða duglegur að sofa á nóttunni og er hættur að drekka á nóttunni, en elska að koma uppí til mömmu og pabba á morgnanna og fá sopann minn og kúra smá, stundum sofnum við öll aftur saman og það er voða gott.
- Ég er stundum svolítið óþolinmóður og ef það er eitthvað sem ég vill þá get ég verið ákveðinn og látið heyra í mér en annars þá er ég mjög geðgóður og mömmu og pabba finnst ég mjög meðfærilegur.
---
Þetta er svona það helsta að frétta gaurnum okkar þessa dagana en það næsta á dagskrá er að sortera myndir og skella nokkrum hérna inn minningar um sumarið sem senn er á enda.

Kveðja
Ragnar Númi

Tuesday 22. June 2010

Norðurlandið góða

Jæja núna erum við búin að eyða rúmri viku hérna á norðurlandinu okkar. Við mæðgin komum í síðustu viku en pabbinn kom bara rétt yfir helgina og var að fara aftur suður að vinna í dag. Hans er sárt saknað hérna. En við ætlum að vera hérna í tæpar tvær vikur í viðbót og þá kemur pabbi aftur og sækir okkur á bílnum - Það verður fínt að keyra þetta aftur tilbaka því við erum nefnilega alltaf með svo mikið dót með okkur.
---
Í tilefni af 7 mánaða afmælinu þann 16.júní þá fékk gaurinn sína fyrstu klippingu. Mamman klippti toppinn og snyrti hárið í kring um eyrun - við erum ekki frá því að hann hafi elst alveg helling við þetta.

Þannig að gaurinn tók á móti þjóðhátíðardeginum nýklipptur og fínn en við héldum upp á hann á Akureyri með Helgu ömmu og Ragga afa, Emil og Danna og fjölskyldu og Grenó liðinu og svo komu líka bræður Helgu ömmu í mat í Heiðarlundinn. Það var sko svaka fjör þarna hjá okkur eins og vant er þegar allir koma saman og maturinn rosalega góður.

Föstudagurinn fór síðan í slökun og sólbað á Hauganesinu enda veðrið alveg meiriháttar gott og um kvöldið kom síðan pabbinn til okkar.
---
Á laugardaginn fórum við í sund á Hrafnagili með bræðrum. Veðrið lék við okkur og það var gaman að busla í stóru sundlauginni. Danni og Emil fóru í rennibrautina og skemmtu sér konunglega. Á meðan við mæðgin vorum að busla þá var pabbi að bílast með frændum því jú það voru bíladagar á Akureyri og Sigursteinn frændi og Arnar frændi báðir að keppa. Þeir unnu reyndar ekkert þetta árið en stóðu sig samt sem áður vel.
---
Sunnudagurinn (20.06) fór ekki alveg nógu vel hjá okkur. Eftir morgunmat og morgunverkin var farið út í garð að leika, eins og svo oft áður. Fjótlega tókum við síðan eftir því að Ragnar Númi var orðinn frekar rauður aftan á hálsinum og síðan þegar betur var að gáð þá var allur búkurinn orðinn rauð flekkóttur og greinilegt að þetta voru ofnæmisviðbrögð við einhverju. Mömmunni leist nú ekki alveg á blikuna og því var ákveðið að bruna beint á slysadeildina hérna á Akureyri. Þegar þangað var komið var allur búkurinn orðinn rauður og roðinn farinn að leita meira niður á fætur, út hendur og upp á háls og áleiðis upp andlitið. Því þurfti litli strákurinn okkar að fá stera og ofnæmilslyf. Hann var nú ekki alveg sáttur þegar verið var að fá hann til að gleypa þetta, litla skinnið, en það hafðist og hann tók síðan bara lúrinn sinn og svaf þessa sjúkrahúsdvöl af mestu af sér. Lyfin virkuðu greinilega vel á strákinn því roðinn fór strax að hjaðna og var lítið eftir þegar við yfirgáfum slysadeildina um 4 tímum seinna. Við vitum ekkert hvað kom þessu af stað því hann fékk hvorki egg né mjólk um morguninn þannig að eitthvað annað var að kalla fram þessi viðbrögð. Við fengum líka lyf með okkur sem hann þarf að taka í nokkra daga. Það góða við þetta allt er að allt húðvesenið er farið, þ.e. allur roði sem var í húðinni og exemið, það er því vonandi bara að þetta sé allt búið og gerist ekki aftur.
---
Litli strákurinn okkar er því búinn að vera pínu litill í sér síðan þetta gerðist en hann var allur að koma til í dag, er að verða líkari sjálfum sér. Hann er farinn að hlaupa um í göngugrindinni, finnst sko æði að geta ferðast aðeins um húsið. Hann leikur sér að dótinu hérna en er alls ekki hrifinn af því að liggja á maganum, í staðinn mjakar hann sér áfram á rassinum. Besti maturinn hans er epli-peru-og sveskjumauk blandað í grautinn og mangó-og bananamauk. Síðan finnst honum rosalega gott að naga harðar kringlur - þær klóra vel í góminn. Hann er líkur mömmu sinni með það að honum finnst gott að sofa frameftir á morgnanna (jább sofum stundum alveg til að verða kl 10!) - sérstaklega ef hann fær að koma uppí - og þá kúrir mamman bara með :)

---
Við ætlum svo að reyna að gera eitthvað meira skemmtilegt hérna í fríinu okkar á norðurlandinu eins og að fara upp í Mývatnssveit, kíkja út á Karlsá og jafnvel fara í ferð inn í Flateyjardal ef veður leyfir. Svo ef það eru einhverjir hérna sem vilja hitta okkur mæðgin þá bara endilega sláið á þráðinn til mömmu:)

Sunday 13. June 2010

Nýtt efni á síðunni

Þar sem Ragnar Númi er með mjólkur-og eggjaofnæmi ákvað ég að taka saman smá fróðleik um ofnæmi svo að fólkið okkar geti verið smá upplýst um ástand hans. Allar upplýsingarnar eru í tenglunum hérna til hliðar en ég setti inn almennar upplýsingar um ofnæmi og smá upplýsingar um matvörur, eða það sem má borða og hægt er að nota þær upplýsingar til að styðjast við við matarinnkaupin. En þar sem Ragnar Númi er ennþá á brjósti og verður það vonandi eitthvað áfram þá þarf mamma að hugsa vel um hvað hún borðar. Því þýðir ekkert að bjóða okkur í rjóma-eða majones kræsingar núna þegar við komum norður í júní:)
---
Af því að mamman er að verða svo góð í að forrita :) þá var líka sett inn meðgöngusagan og síðan kemur fæðingarsagan þegar búið verður að klára að skrifa hana. Ef þið hafið áhuga á langri lesningu þá endilega kíkið á þetta líka.

Friday 4. June 2010

Ofnæmisfréttir

Jæja við erum búin í tímanum hjá ofnæmislækninum og Ragnar Númi stóð sig eins og hetja, var svo stiltur og þægur og duglegur. En það kom í ljós að litla gullið okkar er ekki bara með ofnæmi fyrir mjólk eins og við vorum búin að komast að heldur líka fyrir eggjum. Þetta þýðir að mamman þarf að taka mjólk og egg úr fæðunni sinni á meðan hann er á brjósti, sem verður eitthvað áfram. Þetta virkaði frekar snúið fyrst um sinn að taka þetta út en við ákváðum að taka þetta bara á bjartsýninni og gera ekkert mál úr þessu.
Í þessa nokkra daga sem við erum búin að taka út mjólkina og eggin þá hefur allt batnað mikið. Barnaexemið sem Ragnar Númi var með á kroppnum er nánast alveg horfið - vorum reyndar líka með krem til að bera á það - og kláðinn og pirringurinn í andlitinu er búinn að minnka alveg rosalega mikið og ég er ekki frá því að það sé léttara yfir öllum hérna.

Mjólkur- og eggjaofnæmi er algengasta ofnæmið hjá svona litlum krílum og mestu líkurnar á að þau vaxi upp úr því - og við vonum að sú verði raunin hjá okkur. Annars þá hafa það allir bara rosalega gott hérna í blíðunni í borginni og við hlökkum til sumarsins:)

Wednesday 26. May 2010

Maífréttir
--- myndir komnar í albúmið --- mamman var að setja inn heeeelling af myndum, endilega kíkið og kommentið:)
---
Já það lítur út fyrir að það verða bara sagðar fréttir hérna einu sinni í mánuði – það er kannski bara ágætt, þá koma allavegana einhverjar fréttir:)
Ragnar Númi er algjör gaur núna, hann er farinn að sitja sjálfur á gólfinu en við höfum nú samt púða í kring því hann á það til að leggja sig bara þegar hann er þreyttur og þá lætur hann sig bara gossa afturábak. Svo um daginn (12.maí) þegar pabbinn kom snemma heim úr vinnunni þá gerði litli gaur sér lítið fyrir og velti sér af maganum og á bakið, bara svona eins og hann hefði aldrei gert neitt annað. Pabbinn var voðalega ánægður að hafa verið heima þá. Hann er nú samt frekar rólegur á gólfinu þessi elska og er ekkert að gera sig líklegan til að lyfta rassinum upp í átt að því að skríða.
---
Ragnar er aðeins farinn að borða graut. Honum finnst hann ekki góður, bara harðlokar munninum eða lætur hann leka út, þetta litla sem ratar inn. Við erum búin að prófa nokkrar gerðir af graut og ávöxtum og alltaf sama sagan.

En við prófuðum eina tegund og þá fékk Ragnar ofnæmisútbrot í andlitið sem er líklega út af mjólkurpróteinum sem eru í þessum graut en ekki hinum sem við vorum búin að prófa. En mamman heldur ótrauð áfram við að troða þessum mjólkurlausu grautun í gaurinn þangað til hann tekur þetta í sátt.

En út af öllu þessu ofnæmis og útbrotsveseni þá erum við búin að fá tíma fyrir gaurinn í lok maí hjá ofnæmislækni sem getur vonandi útskýrt eitthvað fyrir okkur og hjálpað. Mamman er því búin að vera á mjólkursnauðu og fiskilausu fæði í nokkra daga og verður þangað til við mætum til læknisins. Útbrotin minnkuðu helling fljótt á eftir en komu síðan aftur núna – spurning hvort eitthvað mjólkurprótein hafi slysast í matinn hjá mömmu, það getur verið vandasamt að sneiða framhjá þessu.
---
En litli Keisarinn okkar er samt sprækur sem aldrei fyrr. Hann fór í 6 mánaða skoðun um miðjan mánuð og er orðinn 7220g og 68cm. Hann féll aðeins í kúrfunni sinni (var aðeins fyrir ofan meðal og datt niður á meðaltalskúruna) en hjúkkan sagði að það væri eðlilegt þar sem hann ef farinn að hreyfa sig mun meira núna. Hann er líka alltaf á fullu á daginn. Við fengum göngugrind hjá Ragga og Söndru (sem Sigga Bogga á víst) og hann alveg elskar hana. Hann var fljótur að finna út hvernig ætti að koma sér áfram og afturábak og til hliðar.

---
Planið hjá okkur var að fara norður aftur um Hvítasunnuna en þar sem við fórum tvisvar norður í apríl og einu sinni í byrjun maí í afmælið hennar Gunnu langömmu á Króknum þá ákváðum við að spara pening og vera bara í borginni. Það var alveg dásamlegt veður alla helgina og í vikunni á eftir. Á Hvítasunnudag brunuðum við að Kleifarvatni og hittum þar Hönnu frænku og Lúlla vinnufélaga pabba, en þau voru þar með hundana sína. Já veðrið var alveg dásamlegt og erum við búin að vera meira og minna í sólbaði síðustu daga.

---
Ef sumarið verður eitthvað álíka og síðustu dagar eru búnir að vera þá verður sko gaman hjá okkur. En þangað til næst, bless í bili:)

Wednesday 28. April 2010

Aprílfréttir - langt:)
Jæja þá koma aprílfréttirnar:) Í byrjun apríl skuppum við norður. Páskarnir voru fyrstu helgina í apríl og páskadagur akkúrat á afmælisdeginum hennar mömmu. Því var ákveðið að bruna norður á fimmtudagsmorguninn og halda upp á páska og afmæli þar. Ferðin norður gekk vel og við stoppuðum á Efri Mýrum og tókum Emblu frænku með á Hauganesið.
---
Á föstudaginn langa hittumst við frændsystkinin á Karlsá og áttum góðan dag þar. Við lékum okkur úti í snjónum á hinum ýmsu leiktækjum og borðuðum fuuuullt af góðum mat. Myndir frá Karlsárgleðinni má sjá hérna.
---
Laugardagurinn fór í slökun heima á Hauganesi en mamma og Helga amma voru að undirbúa afmælið sem var á Páskadag, 4.apríl. Þá komu nokkrir gestir í heimsókn og gæddu sér á kökum og góðgæti og mamma fékk fullt af flottum gjöfum - hún þakkar kærlega fyrir sig:) Myndir frá páskunum og úr afmælinu má sjá hérna. Síðan kom að því að við þurftum að fara aftur í borgina og þá tók hin venjulega rútína við.
---
Ég fór síðan á framhaldsnámsskeið í ungbarnasundinu. Mér finnst voða gaman að fá að busla í vatninu í stóru lauginni en mér finnst ekki gaman að kafa og verð bara fúll ef ég þarf þess en dótið sem er í sundlauginni hressir mig fljótt við og stundum er ég pínu frekur á það og vill fá að hafa það allan tímann.
---
Í byrjun apríl komu nokkrar vinkonur mömmu úr háskólanum í heimsókn með krílin sín - hún var voða dugleg að taka myndir af krökkunum en engar af stelpunum. En það var voða gaman að hitta alla þessa krakka.
---
Mamma ákvað líka að hafa annan í afmæli hérna í Reykjavík fyrir vini hennar og fjölskyldu hérna og því fengum við fullt af kökum aðra helgina í röð. Pabba fannst það sko ekki slæmt. En það kom fullt af fólki í heimsókn og voða gaman að hitta alla og spjalla. Aftur fékk mamma fullt af flottum gjöfum sem hún þakkar kærlega fyrir. Það voru teknar nokkrar myndir í afmælinu og fyrir afmælið og þær má sjá hérna.
Elín Margrét frænka mín kom líka í afmælið með mömmu sinni og pabba og það var tekin smá myndasería af okkur. Þessi frænka mín var nú aðeins handóðari en ég (ég er nefnilega alltaf svo stilltur sko) og foreldar okkar skemmtu sér konunglega yfir því að horfa á okkur hnoðast í sófanum. En alla myndaseríuna má sjá hérna. Mamma bara gat ekki valið úr:)
---
Síðan komu Villi og Sammi í pössun til okkar því Hanna frænka var í UK í hundaskólanum sínum. Það var voða gaman að hafa þá. Villi var nú ekkert mikið að abbast upp á mig og hélt sig í öruggri fjarlægð en Sammi var voða forvitinn. Þeim fannst nú ekkert leiðinlegt að vera hérna saman og stundum var þvílíkur ærslagangur og leikur í þeim. Best fannst þeim samt að kúra saman í sófanum. Myndir hér.
---
Ég fór í 5 mánaða skoðun 20 apríl. Hjúkkunni á heilsugæslunni leist bara vel á mig en nú er ég orðinn 7020gr og 67cm. Ég fékk eina sprautu núna (sama efni og síðast) og ég stóð mig eins og hetja, fann bara varla fyrir þessu og hélt bara áfram að skoða dótið mitt, en mér leið ekki nógu vel um kvöldið og var ennþá hálf slappur daginn eftir.
---
Ég er búinn að fara í mína fyrstu flugferð - fór meira að segja í tvær á sama degi! Ég og mamma ákváðum að skreppa aftur norður og fara í afmæli til Danna frænda. Þegar við vorum rétt komin í loftið þá þurftum við að snúa við og lenda aftur í Reykjavík og bíða á meðan verið var að redda annarri vél því sjálfstýringin í hinni vélinni var eitthvað biluð, síðan biðum við líka smá í nýju vélinni á meðan verið var að laga einhvern míkrafón sem þurfti að vera í lagi. En síðan eftir um klst bið í það heila fórum við aftur í loftið og ég var bara hinn ljúfasti og svaf nánast alla leiðina norður - mömmu til mikillar ánægju:). Í flugferðinni suður var ég vakandi allan tímann og bara lék mér að dótinu mínu.
---
Við mamma vorum bara í algjörri slökun fyrir norðan. Vorum í góðu yfirlæti á Hauganesinu og höfðum bara hægt um okkur. Ég fékk að skoða allt flotta dótið sem Helga amma og Raggi afi eiga og mér fannst voða gaman að spila á litla píanóið og að sitja í Hókus Pókus stólnum og leika mér. Við fórum líka í afmæli til Danna frænda og svo ég hitti líka Fríðu þeirra Flóka og Öddu. Hún er alvegt svaka flott skvísa. Hún er 3 mánuðum yngri en ég en samt næstum því jafn stór og ég! Myndir frá norðurferðinni okkar mömmu má sjá hérna.
---
Ég er að verða voða duglegur að sitja og finnst það voðalega gaman en þarf ennþá smá stuðning. En það bólar ekkert á því að ég fari að velta mér af maganum og á bakið - ætli ég sé ekki bara of latur. En ég er samt mjög forvitinn um allt í kringum mig og vill helst fá að vera með í öllu en þá er best ef einhver heldur á mér. Ég er samt alltaf mjög hress og finnst mamma alveg sérstaklega fyndin sko. Ég er aðeins farinn að smakka mat. Þann 10. apríl fékk ég smá banana hjá mömmu og pabba. Það var nú frekar skrítið og fór nú held ég meira á smekkinn minn en ofan í mig. Síðan fyrir norðan fékk ég líka smá banana og það var bara alveg eins-hann var bara ekkert öðruvísi á bragðið:). Mamma og pabbi voru samt að bíða með að gefa mér graut að borða þangað til nýjustu tölur væru komnar í hús og núna eru þær komnar og því fékk ég í fyrsta skiptið graut 28.apríl (á afmælisdaginn hans Halla langaafa heitins). Ég var nú ekkert alveg viss hvað ég átti að gera við þetta jukk sem mamma setti upp í mig - þetta er vont en það venst!
---
Í dag á Dagný móðursystir afmæli og óskum við henni innilega til hamingju með daginn og ekki nóg með það þá eignaðist ég líka lítinn frænda í morgun. Elmar, bróðir pabba, og Hildur eignuðust ekkert smá flottan dreng kl 07:07 í morgun og hann var 3850 gr og 53cm. Við förum og kíkjum á þau öll þegar þau verða komin heim og búin að kynnast hvert öðru aðeins.
---
Annars þá er hægt að skoða allar myndirnar, sem mamma er búin að likna á hérna í þessum pisli, í myndaalbúminu mínu - þar er líka hægt að kommenta við myndirnar og okkur finnst voðalega gaman þegar það er gert:)

Sumarkveðja til ykkar allra:)
bless í bili - Ragnar Númi Reykjalín

Tuesday 23. March 2010

Hverjum er ég líkur?
Það er alltaf verið að spá í hverjum ég sé líkur. Flestum finnst ég nú mjög blandaður - ég hef greinilega fengið það besta frá báðum foreldrum. En stundum koma svipir sem minna meira á annað foreldrið..eins og kannski sést hérna:)

Thursday 11. March 2010

Marsfréttir

Jæja það lítur út fyrir að það komi bara fréttir hérna einu sinni í mánuði!
En við erum flutt:) komin niður á jörðina. Bára amma frestaði USA förinni sinni svo hún gæti hjálpað okkur að þrífa og Helga amma og Raggi afi komu og hjálpuðu til við restina af flutningunum og að taka upp úr kössum. Jóhannes "afi" var ötull við að hjálpa til við kassa og húsgagnaflutningarnar. Sem betur fer fengum við íbúðina örlítið fyrr en áætlað var en það var mjög gott því það fór að snjóa alveg heilan helling þessa síðustu helgi í febrúar og þurfit að moka frá útidyrunum til að komast inn. Reyndar var þetta enginn heill hellingur sem hafði safnast fyrir hurðinni en nóg! En snjórinn staldraði ekki lengi við.
Nýja íbúðin er mjög notarleg, við erum að verða búin að koma okkur fyrir að mestu - bara smá dytt eftir sem kemur smám saman.
---
Ragnar Númi fór í 3mánaða skoðun 2. mars og fékk þá sína fyrstu bólusetningu (barnaveiki, stífkrampi, kíghósti, mænusótt og hib (barnainfluensa)). Hann var nú ekkert alveg sáttur við það - leit á lækninn með svona "hvað ertu að gera mér kona!" - svip og grét smá en síðan var það bara búið. En um kvöldið fékk hann 38 stiga hita og fékk þá stíl en svaf þetta síðan bara af sér - algjör hetja þessi elska. En þarna var hann orðinn 6140gr og 62,5cm og stækkar alveg eftir kúrfunni. Ekkert smá flottur strákur.
---
Við erum síðan byrjuð í ungbarnasundi sem er tvisvar í viku í mánuð . Okkur hlakkaði mikið til að byrja því Ragnari Núma finnst svo gaman að busla og sparka í baðinu og vatnið skvettist út um allt þegar hann er í tekur sig til við sprikklið. Við erum búin að fara í tvo tíma núna og honum finnst voða gaman. Hann var reyndar mjög alvarlegur í fyrsta tímanum og var mikið að skoða ljósin þarna og glampann á vatninu. Síðan er köfunarviðbragðið æft í hverjum tíma og þegar sundkennarinn er ánægður með viðbragðið hjá hverju og einu þá er prófað að setja þau pínu í vatnið og síðan alltaf meira og meira smám saman. Ragnar Númi fær líklegast að prófa að setja andlitið í vatnið í næsta tíma, en hann verður alveg uppgefinn eftir sundtímann og fær sér þá smá kríu eftir sundið.
---
En litli sporðdrekinn okkar er að verða frekar ákveðinn drengur og það er margt sem honum líkar og líkar ekki.
Það sem er ekki skemmtilegt núna er t.d
Liggja á maganum - en þráðurinn þarna er óðum að lengjast og því lætur hann sig hafa það að vera í smá tíma á maganum.
Láta klæða sig í fötin og þá sérstaklega útifötin og að fá húfu - það er bara ekki gaman!.
Bíða eftir að mamma lagi sig til áður en mjólkin kemur - ef hann er svangur þá nennir hann ekkert að bíða!
Láta halda á sér í fanginu eins og litlu barni - hann er sko orðinn stór strákur.
En það sem er gaman:
Spjalla - það er gaman að fá ALLA athyglina
Fara í bað - það er svo gaman að busla
Sprikkla á skiptiborðinu - helst með enga bleiu, en þá kemur líka oftast pissubuna, eins gott að vera ekki fyrir!
Þegar mamma gerir skrítin hljóð - mjög gaman að reyna að herma eftir hljóðunum.
Horfa á Simpson - svo flottir litir.

Og rétt áðan lærði Ragnar Númi að velta sér af maganum yfir á bakið.

Monday 15. February 2010

Fyrsti hláturinn
Ragnar Númi fór í bað í kvöld sem er svo sem ekki frásögu færandi nema hvað að honum fannst svo fyndið þegar tásurnar fóru í þvottapokann. Og það besta er að við vorum akkúrat að taka video af honum þannig að við tókum video af því þegar hann hló upphátt í fyrsta skiptið. Ég er að reyna að vinna að því að setja videoið á netið..gengur eitthvað brösulega samt. Ef það tekst ekki þá verðið þið bara að koma í heimsókn og sjá það hérna hjá okkur:)

Febrúar fréttir
Jæja núna er febrúar hálfnaður. Ragnar Númi verður 3.mánaða á morgun en við förum ekki í 3ja mán skoðun fyrr en 2.mars! Greinilega eitthvað mikið að gera á heilsugæslunni. En gaurinn okkar heldur bara áfram að stækka, svona gróflega tommustokksmæling segir að hann sé orðinn 63cm en það er spurning hvort mæligræjan á heilsugæslunni verði sammála.
---
Rútínan er alveg að komast í gang, hann fer að sofa milli 21 og 22 á kvöldin og drekkur 1-2 yfir nóttina, fer eftir því hvenær hann drakk áður en hann sofnaði. En hann er nú ekkert svo gráðugur drengurinn því ef hann er ekki svangur þá bara vill hann ekki borða! orgar bara á brjóstið ef ég kem með það nálægt honum..hann er greinilega strax orðinn ákveðinn ungur drengur :)
---
Aðal fréttin er samt sú að við erum komin með íbúð. Duttum niður á eina hérna í Garðabænum þannig að við erum ekki að fara langt. Verðum reyndar aðeins lengra frá Grétu mágkonu en bara steinsnar frá Hönnu systir. Það besta við nýju íbúðina er að hún er á jarðhæð þannig að ég get sagt bless við 4. hæðina þegar við flytjum héðan :) og konan sem á íbúðina sagði að í sól og blíðu þá væri alveg molla í garðinum þannig að þið sem vijið fara í sólbað þá komiði bara til okkar. En áætlaður afhendingardagur er 25.feb en við erum búin að pakka niður því helsta og fara með í geymsluna þannig að þetta ætti að ganga greiðlega. Amman og afinn af Hauganesinu ætla líka að koma í borgina og hjálpa okkur. Þannig að þetta ætti ekki að taka langan tíma.
---
Það er komið alveg helling af myndum í febrúar albúmið hjá Ragnari Núma. Endilega kíkið á myndirnar og kommentið það er svo gaman.